Ynne ka sngi yaka yaw yong ka JHADC kawa tip kam ka Iawthymme kawa em ha Lad Stadium, Jowai da wai biang yaka hadien wa neiliang ki bor wa toh u pait yaka yaw yong ka District Council da ye ki u pynbait heiyatoh kiwa chongdai itæ toh deiwa pyn yajngai iwi yei wi para wa chong yaw.
Yei rukom pyn yajngai hapyrdi kiwa chong yaw da booh da ki number 1 wei 2, iwa mut kiwa chong dai wa yoh number 1 chong ki ynne ka sngi katwa mynstep won u chong da kiwa yoh number 2, wei ini i rukom chong chisngi da ka pali u pteiñ i.
Ha ini i wai yaka yaw ka JHADC, ki sahep yong ka Council wa kynthup nadooh u Deputy Secretary In-charge Market, u H. Lamin wa kiwi da hiar ki cha Iawthymme nadooh i step yow pyntikna wa i rukom chong dai u man ko kawa lai bait lai ryntih.
Chooh chooh da em leh kiwa kreh ka JHADC kiwa man kam ki Volunteer yow sonteri ya kani ka yaw chirup i yakrehlang ki Volunteer yong ka dorbar chnong Ladthadlaboh wa ka dorbar chnong Dongmihsngi.
Kam wow pynkynmoo wa ya kani ka yaw yong ka JHADC da khang yaka haka 3 tarik uni u bnai da ki bor District ka West Jaiñtia Hills neidaw wa ki paidbah wa chong dai wym em u bood ki ya ki kyndon yada nei poor u khñiang khlam COVID-19.
