Ka DC ka East Khasi Hills ha ka kyrwoh wa phah ko, da ong wa katkam wa pyntip da ki bru wa chemphang hei chait i khiah, kiwa yoh COVID-19 ye ki wow em 25 chah na kiwa da chem wei ini toh neidaw wa kiwa boon wa yoh ya uni u khñiang toh kiwa ym em kiwon kiwon ki dak ki chin wa chitom kamjooh leh wym bien ki bru wow wan chakhmat yow phah Test neidaw wa tieñ ki ya chah kyntait haka imlang sahlang kamtæ kini da man ki kam kiwa rah ya uni u khñiang khlem em wa tip.
Da pyntip leh wa naooh ka 1 tarik uni u bnai da ku bha kiwa yoh COVID-19 ha East Khasi Hills deiwa em 2098 ngut kiwa dang yoh wa 59 ngut kiwa yap du ha ki 11 sngi. Deiwa kheiñlang ini da man kamwa 191 ngut kiwa yoh wa 5 ngut wa yap man-ka-sngi. Ki Hospital leh da sdang dap ki pyllong ki wa ki ICU ki. Kiwa boon na kiwa yap toh kiwa da heh rta kiwa em chwa ki kjut wei em leh kiwa em 20-50 snem kiwa yap kiwa ym em i chitom.
Da ong ko leh wa hanla da pynkrehkaam da ka Lockdown yow khang yei lai i wan ki bru tangwa i pteiñ i ku kiwa dang yoh ya uni u khñiang pynyoo wa da poor uni u khñiang para kiwa chi yung wa hapoh ka chnong ka thaw.
Kamtæ da phah ya kiwa chong chnong wow kheiñ ki ya idæ kam kiwa rah ya uni u khñiang kiwa ym em ya ki dak ki chin wei wow deiñ ya ki Mask hanla em hapoh yung leh ha kini ki 14 sngi wow wan, toh u chong khop ha yung, ym toh wow laike cha ki jan yung.
Ki dukan dai ya ki mar wa emkaam daw wai ya ki ha ki jar jiar ki dong wei toh u lai du uwi donhi na chi yung wow lai thied ya ki mar wa emkaam.
Chooh chooh da pyntip wa 50% na kiwa dang yoh ya uni u khñiang toh ki High Risk Contact namo kiwa yachem wa kiwa yoh COVID-19 kiwa para chi yung chi sem, ki jan yung, ki para wakreh kamtæ da emkaam wow syndong hanla em ha yung wa ha ki thaw kreh.
Lada em won kiwa yoh ki dak ki chin wa chitom ki, toh u Phone ki cha u 14410. Ki bru wa da heh rta toh u neh bait ki hapoh yung.
Ka DC da pynchlur ko leh wow wan chakhmat wow chim yei dawai tika.
