U Symbood Montri Rangbah ka jylla, u Prestone Tynsong da ong u ynne wa ka sorkar da pynkhreh ko ya ki thaw sah neibynta kiwa e sumaar ya kiwa yoh COVID-19, tangwa ymtoh neibynta waroh kiwa kreh ha ki Hospital.
Neiliang u Prestone ynne ka sngi da ong u wa ka sorkar da booh biang ko ya ki thaw sah neibynta kiwa kreh ha i chait i khiah, kiwa sumaar ya kiwa yoh ya u COVID-19, katwa ya kiwi won hanla kreh ki ha ki Hospital tangwa ymtoh kiwa sumaar ya kiwa yoh COVIUD-19 da chah wow liwan ki cha jar jiar ki yung ki sem.
Heiyatoh wa ki jooh ki Doctor kiwa sumaar ya kiwa chah ktah ha u COVID-19 wa ya kiwi won kiwa jait kjut, neiliang u DHS (MI) u Dr. Aman War da ong u wa katwa ye kiwa sumaar ya kiwa yoh kjut COVID-19 ym jooh lai de ki wow sumaar ya kiwi tawon ki jait kjut heiwa da em ki Doctor Specialist næ kiwa hap wow pait lang ya waroh kiwa kjut, tangwa na kini ym em iwon iwon i maa neibhah hawa lai ki wow sumaar ya kiwa yoh COVID-19 da pynbiang lut ki ya ki laad yada.
Hawa kylli hajrong ka bai sumaar ha ki Hospital samen ya kiwa yoh ya u khñiang COVID-19, neiliang u Prestone da ong u wa ka sorkar ye ko wow yarap du ya kiwa em ya ka MHIS, katwa kiwi kiwa ym em pyrtuid ha ka MHIS daw hap su hi ki ya i lut i sep.
Hawa kylli hajrong i yarap ka sorkar cha ki Hospital samen kiwa sumaar ya kiwa chah ktah ha u COVID-19, u Symbood Montri Rangbah da ong u wa neiliang ka chnat i chait i khiah jooh pynman ko ya i phyllu yumut man ka 2 sngi wa kiwa pynlai ya ki thaw sumaar, hawa emkaam yarap næ chem chitom ki, neiliang ka sorkar smat ko wow e kyrchaan ya ki.
