Ka sorkar Meghalaya ynnin ka sngi da pynbna ko wa u sdang noh u e tika COVID-19 neibynta kiwa em 18-44 snem hapoh ka jylla nadooh ka 14 tarik hadooh ka 16 tarik uni u bnai heiwa kiwa kwah wow yoh ya ini i tika hap ki wow Register hapoh ka website www.cowin.gov.in dep te jied won ya i thaw wow lai chim yei tika iwa da booh ha ki jar jiar ki District ha ki thaw sumaar yong ka sorkar wa ki yong ki bru samen heiwa da booh 100 hadooh 150 ngut kiwa ye u yoh chi sngi.
Ya kitu kiwa da dep wow Register, ynne ka sngi nadooh i por 12:00 waje i pyrdi sngi da chah ya ki wow ksoh (Book) yei thaw yong ki wow chim tika heiwa ha East Jaiñtia Hills, East Khasi Hills, Ri-Bhoi wa ha West Garo Hills du hapoh 3 kynta da chim lut ya waroh i bhah wa da booh katkam wa pynyoo ka website Cowin.
Ini i tika u man i dei mynkna ha ki thaw sumaar sorkar tangwa ha ki thaw sumaar ki bru samen da chongdor T. 500 chisien e.
Hadooh ynne i miet hawa pynmih ya kani ka khubor, ha kiwa boon ki District toh kiwa da dep wow ksoh lut yei bhah wa da booh ha ki lait noh sa kattu katni kam ha East Garo Hills, South Garo Hills, South West Garo Hills wa ha West Jaiñtia Hills.
Waroh ki thaw e tika hapoh ka jylla neibynta kiwa 18-44 snem da em ki 18 tylli wa kynthup ya ki 4 tylli ki Hospital ki bru samen wei heipor lai chim yei tika hap leh wow rah lang wa ka ID wa da khana heipor wa Register.
I e tika ya kiwa da em 45 snem chaneiñ toh iwa dang pteiñ hi kamwa da leh nadooh ini wa dep.
