Katkam wa pyntip ka sorkar ha ka 10 tarik uni u bnai heiwa ki bru wa chemphang hei chait i khiah da ong ki wa kiwa yoh ya u COVID-19 hapoh ka jylla ye ki wow em 25 chah na kiwa da chem hapoh ka jylla. Wei ini toh neidaw wa kiwa boon wa yoh ya uni u khñiang toh ki wym em ya ki dak ki chin wa chitom kamjooh neidaw wa tieñ yei chah paitkhmat wei chah kyntait ha ka imlang sahlang ym bien ki wow wan chakhmat. Kamtæ kini kiwa rah ya uni u khñiang ki wym tip wa yoh ki ya uni u khñiang da pynpoor ki ya uni u khñiang cha kiwa ha yung ha sem yong ki wa ha ka imlang sahlang.
Neiliang u DC ka West Jaiñtia Hills District u Garod LSN Garod da ong u wa nadooh ka 1 tarik uni u bnai da ku bha kiwa yoh ya u COVID-19 hapoh ka District hanla da pynkrehkaam ya ka Lockdown kamjooh deiwa booh kyndon yei lai i wan wei kamjooh ya kiwa boon ki kaam.
Da ong u leh hanla da pynkrehkaam ya ka Lockdown wa i khanglaad yei lai i wan, i boon kiwa yabi ya uni u khñiang pynyoo ko yei joor wa poor uni u khñiang. Ini pynyoo i leh wa ka Lockdown ye ko wow kdoh u khoom yei poor u khñiang ha ki thaw paidbah, i poor hapyrdi kiwa ha yung ha sem wa kiwa yajan i sdang i wei ye ko wow ku ha kini ki sngi wow wan.
Kamtæ da phah ya kiwa chong chnong wow kheiñ ki ya idæ kam kiwa rah ya uni u khñiang ki wym em ya ki dak ki chin wei wow deiñ ya ki Mask hanla em hapoh yung leh ha kini ki 14 sngi wow wan, toh u chong khop ha yung, ym toh wow laike cha ki jan yung.
Ki dukan dai ya ki marbaam wa emkaam daw wai ya ki ha ki jar jiar ki dong wei toh u lai du uwi donhi na chi yung wow lai thied ya ki mar wa emkaam.
Chooh chooh da pyntip wa 50% na kiwa dang yoh ya uni u khñiang toh ki High Risk Contact namo kiwa yachem wa kiwa yoh COVID-19 kiwa para chi yung chi sem, ki jan yung, ki para wakreh kamtæ da emkaam wow syndong hanla em ha yung wa ha ki thaw kreh.
Lada em won kiwa yoh ki dak ki chin wa chitom ki, toh u Phone ki cha u 14410. Ki bru wa da heh rta toh u neh bait ki hapoh yung.
Ki bru wa yachem wa kiwa yoh COVID-19 kiwa dang yang ya ka Test Result lada yoh ki ya ki dak ki chin wa chitom kam i ky’oh, iñdoh wa kiwi kiwi wow phone ki cha u 14410.
UDC da pynchlur u leh wow wan chakhmat wow chim yei dawai tika kamjooh wow myllien wow im deiwa yajngai uwi ya uwi, u sait yei kti chwa wow tba ya ki khmat, i ktien wa i khmut wei wow deiñ ya ki Mask hawa em ha ki thaw paidbah yow ye u syndong wei wow yada ya idæ na ka khlam.
