Ka Thma U Rangli-Juki (TUR) da thoh ko cha u Montri Rangbah ka jylla u Conrad Sangma yow dawa chimkti hi da ka sorkar jylla yei rukom pynbait e tika COVID-19 ya kitu kiwa em 18-44 snem i rta deiwa ong wa i kaam wa yatoh wa i chait i khiah haap i hapoh i pait ka sorkar jylla.
Da ong wa lada bichaar yei rukom lai i e tika ya kiwa em 45 snem chaneiñ da chem wa duna bha ki bru wa wan chakhmat wei i pyrchah ya ini ym jia i nadooh wa sdang lada ya krehlang wa ki dorbar chnong, ki seiñ niam, ki seiñ ki bru paidbah wa kiwi de hawa pynman ya ki pynsñiawthooh paidbah chaphang i tika wei iwa boon wa da leh yow pynchlur u wan chim yei tika toh du ha ki thaw wa em cha sor.
Da ong leh wa ki jait kreh wa da kynthup hapoh ki wakreh kam ki Frontline Workers, nadooh wa sdang toh u kheiñlang ya kiwa lai tyrwa mar, ki chongdai madan, ki daai, kiwa thoh khubor, kiwa sika skur, kiwa kreh Office, kiwa pynbiang Internet, kiwa li booh tadong LPG wa kiwi kiwi toh u yoh chwa ki ya ini i dawai tika tangwa katni manda poi ka la-ær wa ar da leh jhan wow thooh ya ki yi de ki jait kaam wow kynthup hapoh ki Frontline Worker.
Heiyatoh wa i e tika ya kiwa em 18-44 snem, ka TUR da ong ko wa ym em miat i rukom Register hapoh ka CoWin App wei i duna ki bru wa em ya ki Smartphone daw pynman ko yeini i e tika kiwa leh chilliang.
Kamtæ da ong wa ka sorkar jylla ye ko wow chimkti pynda ka hi ya ini wei i e tika toh u e nyngkong cha kitu kiwa em khih em khan wa kyntup ya ki warep, kiwa khayi wa ki khynroo khyllood kiwa da kreh.
I e dawai tika toh deiwa ya krehlang wa ki seiñ ki bru paidbah, ki dorbar chnong yow pyntikna wa khooid i rukom thap pyrtuid ya kiwa yoh myntoi, i booh por e tika wa kiwa hap wow yang.
Da ong leh wa ki thaw e tika toh u pynman ha kiwa boon ki thaw kiwa em chajan ki paidbah kam ha ki skur, ki yungmane, ki Sports Hall wa kiwi kiwi.
