Ka Khasi Students’ Union War Jaintia Circle deilang wa ka Amlarem Area Unit da lai pait ki ya waroh ki thaw e sumaar hapoh War Jaiñtia wei yei pynkhreh wow yakhun ya u COVID-19. Da chem wa i pynkhreh dang lai i chakhmat wei heijooh i por leh em chiboon i duna ha kini ki thaw sumaar.
Ha Jarain PHC da pyntip u Doctor In-charge wa i pynkhreh dang lai i chakhmat, ha Pdengshakap PHC, u Doctor da pyntip u wa da pynkhreh yong ki da lai i chakhmat wei da ye leh u pdiang ya ki bru wa yoh COVID-19 hapoh ki thaw wa da booh kyrpang katwa ye ki u pynpsiah.
Tangwa da man iwa jynjar hadooh kattæ kattæ neibhah ki yung krehkaam ym toh kiwa biang wei kiwa kjut na kiwi ki jait kjut leh wan ki man-ka-sngi wow thiah ha kani ka PHC wei na ini i daw man ko iwa chitom wei booh yei eh hadooh kattæ kattæ neibhah ym em thaw wow booh kyrpang deiwa ye u pynjngai.
Hawa yatoh wa ka Nongtalang CHC, u Doctor In-charge da pyntip u wa ki thaw thiah wa kyrpang em ki chiphaw kamra wei da em leh ki tiar pynemkaam kam ki Oxygen Cylinder wa kiwi ki tiar wa ye wow yada na kani ka khlam, tangwa iwa eh kani ka CHC toh wa lada dooh bordiñ, ym ye wow pynkrehkaam ya ka Oxygen, wei ka Solar wa em ha kani ka CHC leh ym em krehkaam ko wei ym em wa wan wow pynchna ka.
Hawa yatoh wa ka PHC Dawki, u Doctor In-charge da ong wa kani ka thaw sumaar toh kawa da slem wei ka yung leh man ko kawa khian wei da chem chitom wow pynpsiah chiboon ki wakjut wei lada jia wa em kiwa yoh COVID-19, da hap wow booh bait ha i jooh wa kiwi wei ym ye wow leh iyi iyi leh, hap u sumaar lang wa kiwi kiwa kjut.
Kamtæ ka seiñ da ong ko wa ha ini i yachem wa ki Doctor da yoo wa emkaam wow booh ya kawi ka Corona Care Center hapoh Amlarem Sub Division wei neiliang ka seiñ da kyntu joor ko ya ka sorkar wow pynpoi chooh chooh næ pynbiang chwa khamtam ya ki Oxygen wa ki dawai kiwa ye u kdoh u khoom ya uni u khñiang COVID-19. Deiwa ong leh wa lada khynnia ki thaw sumaar kam ha Jowai wa Shillong, deiwa em ka wi ka Corona Care Center daw yarap ko yaka thaaiñ War Jaiñtia waroh kawi.
