Neidaw wa i yabi u khñiang COVID-19 hapoh ka West Jaiñtia Hills District nang ku nang ku ki kat nang lai ki sngi, neiliang u Wailadmiki Shylla, MLA ka 2-Jowai Constituency hawa hiar lai pait ynne ka sngi yaka thaw chna yow booh ya ka Oxygen Plant wa em ha Jowai Civil Hospital, Ialong kamjooh leh yaka Corona Hospital wa em ha MCH Panaliar Jowai, da pyntip u wa hapoh ka District emkaam 2 tylli ki Oxygen Plants namo ki thaw wow pynmih la-ær Oxygen.
Ong u wa nyngkong hi da em i tyrwa neiliang ka sorkar wow chna Oxygen Plant du ha Jowai Civil Hospital Ialong, tangwa hadien i pyrkhat jngai ka sorkar chirup waka chnat i chait i khiah da em noh i pynkylla wei da rai wa yaka Oxygen Plant kawa da yoh Sanction u booh chwa ha MCH, Jowai ka thaw wa rap emkaam neibhah kiwa yoh COVID-19 leh boon em ki ha kani hi ka thaw sumaar.
“Heiyatoh wa ka Oxygen Plant da thoohlad kammon u pynsmat, neibhah ha Ialong da chna daka yung khyndaw-bilat katwa heini ha MCH won da pyrkhat u booh daka Prefabricated yow rap smat chooh chooh u pyndep yaka thaw chong ka kor, neibhah kamwa man kattæ ka kor wa da yoh Sanction da em ko ha luti,” ong u Wailadmiki Shylla.
Kamtæ yooluti u wa haki tayaw wow wan da yoh hi yaka Oxygen Plant ka wow e boon i yarap ya kiwa kjut.
Neibynta u yoh biang sa kawi ka Oxygen Plant, ong u wa neiliang ka chnat yong i chait i khiah daw yaklam ki yow pynsmat katwa ye wa lah neibhah ha Ialong leh da emkaam hi yaka Oxygen Plant.
Hawa kylli yaki tiar wa dang emkaam neibynta u yakhun ya kani ka khlam COVID-19, u Wailadmiki ong u kamwa man kattæ dang biang hi nadooh ki Ventilator kiwa da pynkrehkaam, tangwa hap hi wow pyrkhat ya kiwi tawan leh ki laad yarap kat wym tip yi u jia chaphrang.
Ynne ka sngi da synran lang da u Deputy Commissioner ka District u Garod LSN Dykes, u DM&HO Dr. KC Ajar, u Nominated MDC u O. Lamin wa kiwi najrong ki Doctor, ki bru chemphang yong ka chnat i chait i khiah.
