Ki soo tylli ki seiñbhalang kitæ ka KSU, FKJGP, HNYF wa ka RBYF da ong ki wa i ekti ka sorkar ya ki 56 tylli ki 33/11 KV Sub-Station kiwa haap hapoh i pait ka Meghalaya Power Distribution Corporation Limited (MePDCL) cha ka Company kawa na baar ka M/s Broadcasting Engineering Consultants India Limited (BECIL) toh i wym kheiñ yei ood i naam ki paidbah wa kynthup ya ki wakreh ka MeECL wa ki seiñbhalang.
Neiliang ki seiñbhalang da ong ki wa kawi na 8 tylli ki phang wa da dep wow e dei thoh cha u Montri Rangbah ka jylla wa pyrchah ki toh wa ka sorkar daw hap ko wow su T. 3,75,000 man-u-bnai cha katai ka Company.
Chooh chooh i ekti ya kitai ki Sub-Station cha katai ka Company daw pyndooh kreh ko ya kiwa boon ki khynroo khyllood ka jylla khamtam kitu kiwa da pyndep puræ ha ki kaam bordiñ na ki 3 tylli ki Polytechnic ka jylla.
Ki soo seiñ da ong ki wa ka sorkar da chim kabu ko yei em ka Lockdown heiwa ki paidbah ym yoh ki wow pyrchah ya ini i kaam tangwa ki soo seiñ da ong ki wa kani ka khlam ym neh ko yanom wei ya katni ym pynman ya i yakhih tangwa mar ya kut ka khlam daw pynman ya ka yakhih wa joor lada ym pyndam ya ka chithi soskular wow ekti ya ki 56 tylli ki Sub-Station.
