Ka Thma u Rangli-Juki ha ka dorkhat wa da phah cha u Montri Rangbah ka jylla da ong wa i pynkhreh ya ki thaw sumaar wow yaleh pyrchah ya ka khlam COVID-19 toh kawa noh chiliang cha ka Shillong donhi.
Da ong wa na ini i daw da wanrah ya kiwa chitom na kiwa boon ki District cha Shillong hanla ki leh em ki jar jiar ki Civil Hospital ki CHC kiwa da toh u biang ki ICU wa ki Oxygen kamtæ ki Corona Care Centre toh u em leh cha kiwi ki thaw ym toh du ha Shillong wa Tura donhi.
Ka seiñ da kdaw ko leh ini wa dep ka sorkar da pynbna ko wow booh sa ar tylli ki Corona Care Centre ha Shillong wa Tura kiwa tip kam ki Pre Fab namo kiwa da dep chna kiwa sa du u pyndait donhi kiwa chongdor T. 2.5 klur kawi. Kamtæ da ong wa kam kini ki thaw toh u booh leh cha kiwi ki thaw ka jylla.
Ka seiñ da dawa ko leh wa ha waroh ki Hospital sorkar toh u em ki ya ka Oxygen Plant kamjooh leh iwa pynbna ynnin u snem ya ka T. 75 klur wow pynku kyrdan ya ki PHC wa CHC hap wow pynyoo paidbah kammon da pynemkaam ya ka.
Chooh chooh da ong wa ya kitu kiwa ym ye wow chong kset samen ha yung, toh u e laad u sah ki ha ki Corona Care Centre dei mynkna wei yow pynhlur won ya kiwa kwah wow neh ha yung toh u pynbiang ya ki mar wa emkaam hadooh ki dawai.
Heiyatoh won wa ki bru wa dooh u lai khih lai kreh, ka TUR da dawa ko wow e T. 6000 chi bnai cha kawi ka manyung ha kini ki por wa booh ya ki kyndon wow kdoh wow khoom wei heipor wa em ka Lockdown. Ya ki manyung wa dooh wa duk ya ki marbaam rachon toh u e dei mynkna.
