Ka Ministry of Health and Family Welfare (MoHFW) ka sorkar India da ong ko wa i jia wa mih snam lane wa lang snam (Bleeding & Clotting) hadien wa chim yei tika COVID-19 hapoh ka ri man i iwa duna bha wa jia, wei hajrong ini ka India National AEFI (Adverse Event Following Immunization) Committee da e ko ya ka bui (Report) cha ka Health Ministry.
Ya ini i Bleeding & Clotting toh iwa da yaklam ha kiwi ki ri iwa jia hadien wa e yei tika wei da wanrah ya kani ka phang chakhmat haka 11-03-21 heiyatoh wa i tika ka AstraZeneca-Oxford (Covishield). Kamtæ ha India da rai wow pynman ya ka thooh bniah hadien wa da yaklam ya ini ha kiwi ki ri yei em i chah ktah hadien wa chim yei tika.
Katkam i chem ka National AEFI Committee wa hadooh ka 03-04-21 da dep wow e 75,435,381 sien yei tika (Covishield- 68,650,819; Covaxin- 6,784,562). Wei na kini da em 65,944,106 ngut kiwa yoh yei sien wa nyngkong katwa 9,491,275 ngut kiwa yoh yei bhah wa ar. Wei nadooh wa sdang i e tika da em palat 23,000 sien kiwa chah ktah khlem da poi pyrkhat katkam wa da pyntip (Report) ha ka CO-WIN Website ha ki 684 tylli ki District na ki 753 tylli ki District ka ri. Deiwa kheiñ ya ini, kiwa chah ktah khlem poi pyrkhat da em ki 700 tylli ki Case kiwa rap joor da em 9.3 sien ha man ka 10 lak sien wa e yei tika.
Ka AEFI Committee da dep ko wow puræ bniah ya ki 498 tylli kiwa da ong toh kiwa joor i chitom wei na kini da chem wa em 26 tylli ki Case wa ye u man kam ka Thromboembolic (i lang snam) wei ini da man i hadien wa yoh yei tika Covishield tangwa deiwa kheiñ lang, ini da jia i ha ki 0.61 sien man ka 10 lak sien wa e yei tika.
Ka sorkar da ong ko leh wa ym em i jia wa lang snam hawa e yei tika Covaxin.
Kamtæ da ong wa ini i chem ka AEFI ha India iwa 0.61 tylli ki Case na ki 10 lak sien wa e tika toh iwa duna bha ya iwa chem ha UK wa da jia 4 sien ha ki 10 lak sien wa e yei tika katwa ha Germany won da jia 10 sien ha ka 10 lak sien wa e tika.
Chooh chooh da ong wa ini i lang snam (Thromboembolic Events) ha ki paidbah katkam wa da dep chem chwa toh iwa duna 70% ha ki bru ka South wa South East Asia hawa nujor wa ki bru kiwa na Europe.
Ka MoHFW da phah ko leh cha ki wakreh hei chait i khiah wa kammon u leh lada kiwa yoh tika em ki ya ki dak ki chin wa lang snam hapoh 20 sngi nadooh wa yoh yei tika Covishield wei kini ki dak ki chin man ki kamni ha wah:
- Chitom u riñ mynsien
- I kjut rupai
- I kjut ki kjat, ki kti manda khem ki, lane em iwa add ha khawah lane ka kti
- Lada mih boon tylli thaw wa kylla rong soo lait na i thaw wa Inject lane, i jngem i sniehdoh ha ki thaw wym toh wa e Inject
- I sooh kpoh wa neh slem lane deiwa khlem prai
- I khai bhur da kitu kiwa em ym jooh khai bhur
- I kjut khlieh deiwa em i prai lane khlem prai ha kitu kiwa ym em chitom na i Migraine lane i kjut khlieh
- I tlot/i yap chiliang ki kti ki kjat hadooh i khmat
- I prai wa khlem ki daw
- I rngu ki khmat hawa pait lane mih ar le hawa pait
- I kylla i rukom man i pyrkhat pyrdaiñ, i sñiawman kulmar, i diaw mynsien
Heijooh i por da ong wa i Covishield da yarap i chibon wow yada nei yabi u khñiang COVID-19 ha kylleiñ ka pyrthai wa ha India. Palat 13.4 klur sien da e ya i Covishield hadooh ka 27-04-21 ha India. Wei ka MoHFW da pteiñ ko wow pyntikna wa man chngaaiñ hi kiwa chim yei dawai tika hapoh ka ri.
