U montri ki kaam yada ri, u Rajnath Singh chirup wa u montri ka chnat i chait i khiah u Dr. Harsh Vardhan ynne da pynlait paidbah ki ya i dawai sumaar COVID-19 iwa tip kam i 2-DG ha DRDO Bhawan.
Ini i dawai wow sumaar COVID-19 namo i 2-deoxy-D-glucose (2-DG) toh iwa da chna da ka Institute of Nuclear Medicine & Allied Sciences (INMAS) kawa man ka chnat ka Defence Research & Development Organisation (DRDO), chirup wa ka Dr. Reddy’s Laboratories (DRL), Hyderabad wei ye i wow pynhiar cha ka 2.5 sngi yow chait wei u pynduna yei emkaam Oxygen da 40%.
Ya ini i dawai da ekti mar chi tadong ha u Dr. Randeep Guleria. Director, All India Institute of Medical Sciences (AIIMS), New Delhi wa u Lt. Gen. Sunil Kant na ka Armed Forces Medical Services (AFMS).
Neiliang u Dr. Harsh Vardhan da e khublei u ya waroh kiwa embynta wow chna ya ini i dawai iwa man leh i dawai wa nyngkong dooh wa chna pyn hapoh ka ri wow sumaar ya kiwa yoh COVID-19 heiwa daw pynduna i ya i emkaam wow e Oxygen ya ki bru.
U Dr. Harsh Vardhan da ong u leh wa kamwa lephaw tylli ki thaw sumaar da pynemkaam wow pyrchang sumaar (Clinical Trials) da ini i dawai iwa da ye wow pyntlot yei bor wow kha pynroi kamjooh i bor wa emkaam u khñiang wow kha roi.
Neiliang u Secretary Department of Defence R&D uwa man leh u Chairman DRDO u Dr. G Satheesh Reddy da pynsñiaw u yei mynsien wa skem wa ini i dawai daw yarap bha i ya ki bru wow yakhun pyrchah ya kani ka khlam wei da kyrmen u leh wa ym slem de daw ye ki paidbah wow yoh ya ini i dawai.
U Chairman, DRL u Kallam Satish Reddy da ong u wa ka Dr. Reddy’s da kmen ko wow krehlang wa ka DRDO wa ka INMAS wow chna ya ini i dawai 2-DG wei pynyoo i leh yei kreh ka Company wow yakhun ya u COVID-19 da ki dawai.
