Ka seiñ Meghalaya People United Front (MPUF) Sanchnong Circle, ynne ka sngi hapoh i yahkhmat u President, u Juny Phawa hei emlang kiwi de kiwa yahkhmat yong ka chnat kani ka seiñ da lai ya chem ki ya u SDO yong ka MeECL, EJHD, u H. Iakai heiyatoh wa i dooh bordiñ ha ka chnong Mukhaialong Dong Pyrdi Chnong.
Ka bordiñ da dooh ko neidaw wa sih ki kor bordiñ.
Heiyatoh wa ini i kaam, da pynche u SDO cha kiwa yahkhmat ka seiñ deiwa ong wa ha kini ki chi sngi ar sngi, daw wan ka chnat krehkaam yong oo yow lai pyndait ki ya kini ki kor wa sih.
Da ong u leh wa rap chimpor wow wan pyndait ya kini ki tiar toh neidaw wym em tiar cheini wei hap wow thied (Order) chwa nawi deiwa pynrap wa ka chnat daw chimkhia ko heiyatoh wa ini i kaam.
Neiliang ka seiñ da e khublei kyrpang ko leh ya u SDO wa da chimkhia u ya ini i kaam.
