Ka All Jaintia Commercial Vehicle Association lyngba u President Rangbah yong ka u Paila Kordor Lyngkot, da e khublei ko ya u MLA ka Jowai u Wailadmiki Shylla wa ya ka PWD wa da chimkhia ki wow pynchna ya u sarok wa em ha chrooh ka Thomas Jones Synod College Jowai.
Da ong wa hanla da man i por wa em ka Lockdown wa heipor wa pynkrehkaam ya ki Containment Measures ha Jowai, u MLA da chimkhia u yei emkaam ki paidbah wei ha i por i wa tbian da dep wow pynbha pynmiat ya uni u sarok wa da sih bha ha kini ki por wa da dep.
Kam wow pynkynmoo, ka All Jaintia Commercial Vehicle Association ha ka 06-04-2021 da dawa joor ko na ki bor wa toh wow pait wow pynchna smat ya uni u sarok wa emkaam uwa ki paidbah pynemkaam ki wow lai cha College, cha Hospital, cha Bank, cha yaw wa cha kiwi kiwi ki thaw.
Chooh chooh ka All Jaintia Commercial Vehicle Association da i mynsien wa kmen, kitbok kitrwiang ko ya u MLA wow nang yoh u dei chait dei nang, yow ye chooh chooh u wow e ya i chakri wa rap bha ya ka ri wa ka jaitbru khamtam wow pynman ya ka Jowai Constituency kawa tyrchaaiñ mynstep mankawi.
