U DC ka West Jaiñtia Hills District da pynmih hukum u ynne ka 18 tarik yow pyntip paidbah wa da yoh yutip na u Senior Manager wa ha Punjab National Bank, Jowai Branch, Iawmusiang (kawa tip nachwa kam ka UBI) da em 1 wa yoh COVID-19 wei da em leh kiwa em hei maa namo ki High Risk Contact hapoh kani ka Bank wa kynthup ya ki bru wa wan emkaam.
Kamtæ ka Punjab National Bank, Jowai u man ko kawa khang nadooh ka 18 tarik uni u bnai hadooh ka 27 tarik uni hi u Naisan.
Da phah ya waroh kiwa lai cha kani ka chnat kani ka Bank wow leh ki ya ka Home Quarantine wa 10 sngi deiwa pait bniah yei long i man i chait i khiah yong ki, wow deiñ ya ki Mask, u yajngai na kiwi wei wow sait ya ki kti dei langær.
Ha kini ki por wa leh Quarantine lada iñdoh, ky’oh, lane chitom wow riñ mynsien wow chongkset wut wut ya idæ wei wow pyntip cha u waheh chnong.
