Ka Federation of Khasi Jaiñtia & Garo People-Jaiñtia Hills Zone, lyngba u D.S. War uwa man u Chief Organizing Secretary ka seiñ da pynsñiaw ko yei pyrchah wa joor yei thmu ka sorkar wow pyndait da u Smart Meter lyngba ka Company Satnam Global Infraproject, katkam ka chithi wa da phah da u Hamjngai Law uwa man u Assistant Executive Engineer ka Khliehtyrshi Distribution Sub-Division MePDCL, haka 12/05/2021.
Ya kani ka chithi da phah cha ki 6 tylli ki chnong kiwa kynthup ya ka Ummulong, Wahiajer, Mukhla Mission, Mukhla Shohshrieh, Mukhla Umlangshor, Lad Mukhla khlem pyntip chwa cha ki paidbah wa chong chnong heiwa da phah bait ya ki bru ka Company wow wan pyndait ya u Smart Meter ha kini ki sngi ha kini ki chnong.
Hajrong ini waroh neiliang ka seiñ da pyrchah joor ko yeini i thmu wow pyndait ya kini ki Smart Meter khamtam hadien wa chem wa ki paidbah ympu tip ware ki ya kini ki Smart Meter wei ka seiñ da ong ko wa hei sakhiat da toh wow pynsñiaw paidbah chwa yeini khnang wa ki paidbah u sñiawthooh ki tangwa phylla won wa kammon ka yung krehkaam ka MePDCL da phah ko ya ki chithi cha ki waheh chnong hajrong ini i thmu.
Da ong ko leh wa ini daw kthah bha i ya ki paidbah, deiwa kylli katwon sien wow thied Meter ki neibhah wa uni u Meter kani ka Company toh uwa sy’at dor wei tang ha ki thaw sor ympu ye ware wow pyndait ya oo kammon won u ye wow pyndait ya oo cha ki thaw palat-sor.
Ka seiñ da ong ko leh wa katkam wa sñiawthooh ko, ha kini ki Smart Meter da em ki ‘Chip’ hapoh wei mar dep pynemkaam palat ka bordiñ leh yap wot ko wei hap Recharge kamwa Recharge ya ka Mobile Phone wei ini daw ktah bha i ya ki paidbah kamtæ ka seiñ da kyntu joor ko ya ki 6 waheh chnong wa kiwi kiwi leh kamjooh wa ymtoh u pdiang ki yeini i wan pyndait Meter.
Da phylla ko leh wa kam ha kini ki por wa em ka khlam COVID-19, kammon won ki bru ka Company kiwa na baar u yoh ki wow wan chapoh ka jylla.
