Ka Khasi Students’ Union (KSU) Namdong Area Unit ha ka 17 tarik uni u bnai deiwa emlang u waheh chnong ka Namdong ‘B’ da lai pait ki yei pynkhreh ya ka Namdong PHC neibynta wow yakhun la jia wa wan ka khlam COVID-19 ha kani ka thaaiñ.
Da chem wa kani ka PHC da pynkhreh ko 4 tylli ki Oxygen Cylinder, 5 tylli ki thaw thiah ha kani ka PHC wei dang em chiboon ki duna wei neiliang yong ka Doctor da pyntip u wa dang paan chooh chooh ya ki tiar wow yakhun ya uni u khñiang COVID-19.
Da pyntip leh wa dang em i duna ki bru wakreh nadooh u Doctor MBBS, ki Staff Nurse, Lab, LD, ki dawai e tika wa ki Oxygen Concentrator.
ki Nurse da pynsñiaw ki yeh neidaw wa duna ki Staff Nurse, wei katni da em leh ki wakreh wa da yoh COVID-19 ha kani ka PHC wei da hap ki wow chong kset ya idæ ha yung, kamtæ ki Nurse kiwa em heini da maad ki chiboon i eh yow pyndap yeiwa emkaam ki paidbah najrong wa em leh ki wakreh kiwa hap leh wow lai man-ka-sngi cha kiwi ki chnong yow lai Test yaki Hight Risk Contact namo kitu kiwa yachem wa kiwa yoh COVID-19.
Hawa yaklam wa ka Doctor ka J. Laloo da pyntip ko wa yei kreh LD katni man ko iwa thylli nadooh wa chah kyrriah kreh wei ym em de wan da kiwi heithaw yong ki.
Da chem leh wa katni ym em dawai e tika de ya kiwa 45 snem chaneiñ wei ka sorkar da pynbna ko wow e tika ya kiwa 18-44 snem tangwa hadooh katni ym pu yoh ya i tika.
Kamtæ neiliang yong ka KSU Namdong Area Unit deilang wa ki dkhot yong ka chnong Namdong ‘B’ da kyrpaad joor ko ya ka sorkar wow pynbiang ya kini ki duna khamtam wa katni wa ka khlam da poor bha ko cha kani ka thaaiñ yow lait nei eh hadien ha bood lada jia wa kani ka khlam u poor smat ko, kamjooh leh da kyntu ya ki bru wa ym toh wow hær-rngu ki wei ym toh wow kheiñ stiñ wei wow man kiwa husiar ym toh wow kheiñ stiñ, wei wow bood ya ki kyndon wa da phah daka sorkar.
