Ynne ka sngi ka 19 tarik, ka KSU Shillong Mihngi Circle da yoh yutip ko wa em ki bru kiwa na baar jylla kiwa da wan yong lang, kamtæ ki dkhot ka seiñ da lai ki wut wut yow thooh wei yow chem dei khmat.
Ka KSU hei chem yong ka da em hadooh 7 tylli ki kari kiwa kit ya kitai ki baar jylla hajan NEIGRIHMS wei hadien wa takit bniah da ki dkhot ka KSU, da tip wa kitai ki baar jylla da wan kit na baar yow lai kreh ha ka yung thymme yong ka Meghalaya Assembly kawa em ha Mawdiangdiang.
Neiliang ka KSU Shillong Mihngi Circle da phah noh ko ya kini wow lai liwan ki cha i thaw wa wan ki.
Kamtæ ka seiñ da ong ko wa ini i wan ki baar jylla hadooh 7 kari toh iwa ki paidbah u hap ki wow kylli wa kammon ka sorkar wa ki wakreh ha khyrdop Entry/Exit Point ha Umling krehkaam ki hadooh wa kitai ki kari da yoh ki wow psiah pyrchah ya ka aiñ.
Chooh chooh da ong wa ha kam ini i por wa em ka khlam ka ngoh heiwa waroh ki paidbah ym yoh ki wow lai cheiwon cheiwon deiwa chong khop ha yung katkam ki kyndon ka sorkar, kammon kitai ki bru da yoh ki wow lai chadooh cheini wei kiyi wow bahkhlieh lada kitai ki baar jylla toh kiwa wanrah ya u khñiang COVID-19.
Kam wow pynkynmoo wa ka sorkar da khang ko wow pynman ya kiwon kiwon ki kaam chna wei ini wa dep da chah du ya kitu ki kaam wa em chwa ki wareh hei thaw pynkreh ym toh deiwa wan rah na kiwi ki thaw.
