Ka Marwari Yuva Manch, Shillong (MYM) deiwa ya krehlang wa ka Marwari Samaj ini wa dep da rai ki wow sdang da ka COVID Care Unit wa Quarantine Centre ya kuti kiwa yoh COVID-19 ha Balika Vidyalaya School, Keating Road, Shillong.
Hadien wa dep wow yaklam bniah wa ka chnat i chait i khiah deilang wa ka NHM, Meghalaya wei deiwa yoh yei pynchlur wei e mynsien, kamtæ da pynlai smat yei kaam chakhmat.
I kreh wow booh ya kani ka thaw pait ya kiwa yoh ya uni u khñiang toh kawa da sdang ha ka 12 tarik uni u bnai wei da pyndep ha ka 19 tarik uni u bnai heiwa da ekti cha ka sorkar ynne ka sngi.
Ya kani ka thaw da wan wow wai da u A.L. Hek, Health and Family Welfare Minister ka sorkar Meghalaya deiwa emlang u Ram Kumar S, IAS, Mission Director, NHM, Meghalaya.
Ha kani ka thaw da em 32 tylli ki thaw thiah kiwa daw pait wei pynlai da ka NHM, Meghalaya. Ki bru wa daw booh ha kani ka thaw toh kiwa chitom malu mala na u COVID-19.
Ka Marwari Yuva Manch da pynlut ko wow pynbiang ya waroh iwa emkaam yow sdang ya kani ka thaw wei daw yarap ki leh wow e baam ym du ya kiwa chitom, kamjooh leh ya ki wakreh kiwa pynlai ya ini i thaw.
