Ka Thma U Rangli Juki (TUR) wa ka Workers Power of Meghalaya da beiñ joor ko yei klam u symbood montri rangbah ka jylla u Prestone Tynsong uwa da ong wa kiwa chong chnong ka jylla wow baam ki du da i ja wa i jhoor.
Neiliang ki ar seiñ da ong ki wa ka thma pyrchah ya u khñiang COVID-19 ym toh ka yaleh hapyrdi kiwa mahajon wa kiwa dooh. Kiwa mahajon wa kiwa biang i kaam i jaam ye ki wow im sa 2 næ 3 snem khlem kamai wei da em leh kiwa hadien san pateiñ ym yap ki lada ym yoh ki wow kamai leh.
Tangwa katni ha kani ka khlam, kiwa dooh wa ki wakreh mylla ym em de ki wot du chisien baam ja leh wow baam. Ym em kamai, ym em poisa wei thiah thylli kpoh ki.
Kamtæ i klam yong u symbood montri rangbah toh iwa pyntakha pynmong chyrkhei bha wei ym ye wow pdiang wei toh u pyndam noh ya ki kyntien wa da khlai u.
Toh leh i kamram wa i kitkhlieh yong ka sorkar wow pait wa ki bru ym yap thngan ki. Kamtæ ka sorkar ym ye ko wow ong wa ym ye ko wow kyrchaan ya kiwa chong chnong ka jylla.
Ka sorkar ka wym em i kitkhlieh wei ka wym em mynsien ya tiplang neibynta kiwa dooh wa duk kiwa tlot bor ha ka imlang sahlang ym em hok ko wow synchaar wei kawa wanrah du ki kynrum kynram suda.
Sa chisien ka TUR wa ka Workers Power da dawa ki wa toh u kyrchaan song poisa ya kiwa mylla sngi. Ki e yumut neiwon wow mih katæ ka poisa leh da dep e. Man i iwa suk ya ka sorkar wow pynkrehkaam ya itai i e yumut lada toh ka sorkar kawa em sakhiat i kitkhkieh wow pait ya waroh ryntih yow jop ki ya kani ka khlam wei ym pynemkaam ya ka khlam kam ka laad baamtooh wei wow banbeiñ ya uwa dooh uwa duk.
