Hadien wa u District Magistrate ka West Jaiñtia Hills District pynmih hukum u ynnin ka sngi wa nadooh i janmiet 6 waje ka 21 tarik u sdang pynkrehkam yaka Total Curfew hapoh ka District hadooh 5 waje i step ka 1 tarik u Naiynru kam chibynta u yada nei poor ka khlam COVID-19, kamtæ da sakhi wa ynne ka sngi kawa man leh ka sngi wa e laad u wai yaki dukan marbaam kamjooh ki yaw dong, dang step ki paidbah da mih ki yow lai li thied marbaaam na ki yaw dong waphær waphær wa em ha Jowai kamjooh leh cha Iawmusiang.
Hei yoh u sakhi ha ki bynta ka Stand War wa chwa ka 9 waje i step, ki paidbah da ya chlong bha ki wow lai thied yaki jhoor, ki soh, kwai pathi wa kiwi wada wan dai madan ha kani ka thaw, kamjooh leh hei bynta rood sarok ka Iawmusiang.
Ini i hær-rngu ki paidbah da pyn mylliñ ko leh ya ki wow bood ya ki kyndon yada nei poor ka khlam COVID-19 kamwa da hukum ka sorkar.
Neitæ da sakhi leh yei em ki paidbah wa boon wa mih ki cha Iawmusiang yow yieñ laiñ haki dukan dai marbaam nei bynta u yang ya ka pali thied mar.
Hawa khyruiñ won cha ki yaw poh dong wa pynlai daki dorbar chnong waphær waphær neidaw wa rap duna bru, ki paidbah leh rap bood hi ki yei kyndon yada COVID-19.
