Ka EJNC-Narwan Unit kam chibynta wow yakhun yei poor smat u khñiang COVID-19, neiliang ka seiñ hapoh i yahkhmat u Shitlang Langstang, General Secretary EJNC-NU, deiwa ya emlang kiwi de kiwa yahkhmat ka Unit, haka 21 tarik uni u bnai da pynman ki yei siat dawai khñiang ya ki dukan kiwa em harood sarok ka chnong Narwan, East Jaiñtia Hills District.
Ya ini i siat dawai da sdang nadooh na Madan Saphai ter ter chadooh Madan Musiew.
Ha i jooh i por ka EJNC-NU da kyntu ko ya kiwa chong chnong yong ka Narwan wa ki yong ka District hi waroh kawi wow bood ryntih ki ya i phah yong ka chnat i chait i khiah khnang wow ye u kdoh u khoom i poor u khñiang COVID-19.
