U MLA ka Khliehriat uwa man leh kam u Montri ka sorkar jylla, u Kyrmen Shylla, ynne ka sngi da pynman u ya ka yalang Review Meeting kawa chongknor da u Deputy Commissioner ka East Jaiñtia Hills District deiwa emlang u MLA ka Sutnga, ki MDC wa ki wakreh ka chnat i chait i khiah yow ya phyllu yei ku kiwa yoh COVID-19 hapoh ka District.
Ha kani ka yalang da yaklam kammon wow yaleh yow pynduna yei yabi u COVID-19, i pynbiang yeiwa emkaam nadooh na tre kam ha ki Waheh Chnong deiwa pynbiang ya ki Ambulance wa ki kari wa kit metyap.
Da yaklam leh yow booh ya ki Community Quarantine Centre ha ki dong wa ki chnong iwa chong katkam i emkaam.
Neiliang u Deputy Commissioner da kyntu u ya ki paidbah lyngba ki MLA wa ki MDC yow pynchlur ya ki paidbah wow wan ki chakhmat yow chim yei tika khamtam kitu kiwa da em 45 snem chaneiñ. Wei wow pynman leh ya ki pynsñiawthooh paidbah ha waroh ki chnong wa ki dong.
U Deputy Commissioner da pyntip u leh wa da phiah ya ka District ha ki Zone kiwa da booh wow pait da ki Zonal Officer. Heiwa ki Zonal Officer toh u pynman ki ya ki yalang wa ki waheh chnong, ki waheh dong heiyatoh wa u COVID-19.
Neiliang ki MLA wa ki MDC da pynsñiaw ki yei emkaam wow pynku kyrdan ya ki PHC wa ki CHC wei yei emkaam wow pynku kyrdan noh pura ya ka 100-Bedded Hospital ka District, deiwa kyrpaad ya ka sorkar wow leh smat ya ini.
Ki MLA wa ki MDC leh da pynyoo ki yei chimkhia ki yei kaam deiwa phah pynbiang baam cha ki thaw wa man kam ki Community Isolation Centre kamjooh wow e PPE Kit cha ki Volunteer ki Dorbar Chnong kiwa yarap pyndep ya ka niam ka rukom kiwa khlaad.
Neiliang u Montri da e khublei u ya u Deputy Commissioner ka EJH, ka Health Department u MLA wa ki MDC yei e buit ki ha kani ka yalang.
