La 10 sngi kiwa dang chait da pteiñ ki wow tam ya kiwa dang yoh COVID-19 ha India wei kiwa dang yoh ha kini ki 24 kynta toh kiwa duna dooh hadien 36 sngi nadooh ka 17-04-21 wei da man ko leh 5 sngi khlem sangeh wa da leh palat 20 lak tylli ki Test ha ka chi sngi iwa ynnin da leh 21,23,782 tylli heiwa kiwa yoh ya uni u khñiang hadien wa Test da em ki 11.34% iwa hiar naka 12.45% ynnin ka sngi.
Kiwa dang yoh ha kini ki 24 kynta da em ki 2,40,842 ngut, kiwa dang chait da em ki 3,55,102 ngut, kiwa dang yap da em ki 3,741 ngut iwa mut wa kiwa dang em ya uni u khñiang da hiar ki da 1,18,001 ngut.
Kiwa boon dooh kiwa dang yoh toh ha Tamil Nadu 35,873 ngut, Karnataka 31,183 ngut, Kerala 28,514 ngut, Maharashtra 26,133 ngut, Andhra Pradesh 19,981 ngut, West Bengal 18,863 ngut, Odisha 11,108 ngut, Rajasthan 6,103 ngut, Assam 5,980 ngut wa ha Uttar Pradesh 5,964 ngut.
Kiwa dang yap dang pteiñ ki wow boon ha Maharashtra kiwa em 682 ngut, Karnataka 451 ngut, Tamil Nadu 448 ngut, Uttar Pradesh 218 ngut wa ha Punjab 201 ngut.
Kiwa em palat 1 lak ngut kiwa dang chah ktah da em ki ha ki 7 tylli ki jylla kiwa boon dooh ha Karnataka 4,83,225 ngut, Maharashtra 3,54,830 ngut, Kerala 2,89,657 ngut, Tamil Nadu 2,84,278 ngut, Andhra Pradesh 2,10,683 ngut, West Bengal 1,31,688 ngut wa ha Rajasthan 1,22,330 ngut.
Da em leh 12 tylli ki jylla ha kini ki 24 kynta wa boon da kiwa dang yoh ya kiwa dang chait wa kynthup ya ka Andaman & Nicobar Islands (4), Andhra Pradesh (1527), Arunachal Pradesh (20), Assam (1242), Lakshadweep (174), Manipur (92), Meghalaya (593), Nagaland (19), Odisha (481), Sikkim (19), Tamil Nadu (9649) wa ha Tripura (674).
Waroh kiwa da chait da em ki 88.30% kiwa em 2,34,25,467 ngut, kiwa dang em ya uni u khñiang da em ki 10.57% kiwa em 28,05,399 ngut, kiwa yap 1.13% kiwa em 2,99,266 ngut, deilang da poi 2,65,30,132 ngut kiwa da dep yoh ya uni u khñiang hapoh ka ri.
Heiyatoh wa i e tika hapoh ka ri, da dep wow e la 19,50,04,1884 sien.
