U montri rangbahdooh ka ri, u Narendra Modi ynne da khut pynman u da ka High Level Meeting wow booddien yei pynkhreh ki jylla wa ki chnat ka sorkar pyrdi heiyatoh wa ka Cyclone ‘Yaas’.
Neiliang ka India Meteorological Department (IMD) da pyntip ko wa ka Cyclone ‘Yaas’ daw poi ko ha West Bengal wa Odisha ha i janmiet ka 26 tarik uni u bnai wa ki la’ær wa beh 155-165 kmph hadooh 185 kmph.
Da ong ko wa kani ka Cyclone daw wanrah ko ya u slap wa joor ha West Bengal wa Odisha deiwa maham leh wa ka um duriaw ye ko wow ku hadooh 2-4 mtr ha ki rood duriaw kini ar jylla.
Chooh chooh da pyntip leh wa u Cabinet Secretary da khut yalang u ya ka National Crisis Management Committee (NCMC) ha ka 22 traik uni u bani wa ki Chief Secretary yong ki jylla wa em pood harood duriaw.
Neiliang ka Ministry of Home Affairs (MHA) leh da booddien ko 24 kynta wa ki jylla heiyatoh wa i pynkhreh wow yarap hadien ka Cyclone heiwa da phah leh ya ki chipai ka SDRF cha kini ki jylla kiwa ye wow chah ktah ha kani ka ær-yong.
Neiliang ki chipai ka Indian Coast Guard wa Navy da phah ki ya ki jhaad yong ki wow e yarap hawa emkaam kamjooh leh neiliang ka Army leh da man ko kawa da pynkhreh.
Ka NDRF da sdang ko wow e yarap ya ki bor ki sorkar jylla wow man ki kiwa da pynkhreh wow kyrriah ya ki bru na ki thaw wa ye bha u chah ktah.
U Modi da phah u leh ya ki sahep wa ha khlieh yong ki chnat wow kreh chirup wow kyrriah ya ki bru na ki thaw wa em hei maa, wei da phah u leh wow pynkhreh wow chna smat biang ya ki kaam bordiñ wa kiwi kiwi ki wa ye u thut nei wan kani ka ær-yong.
Ha kani ka yalang da emlang u Home Minister, Principal Secretary u Prime Minister, Minister of State ka Home Affairs, Cabinet Secretary, ki Secretary ki Ministry/Departments of Home, Telecommunications, Fisheries, Civil Aviation, Power, Ports, Shipping & Waterways, Earth Sciences, Chairman Railway Board, Members & Member Secretary ka NDMA, ki Director General ka IMD wa NDRF wa kiwi kiwi.
