Kam ha kini ki por wa em i khang-sbak neidaw ka khlam COVID-19, ki paidbah khamtam kiwa khih mylla da chem chitom bha ki wow lai khih lai kreh wei ini da pynbor i ya ka seiñ Meghalaya People’s United Front (MPUF-EJHD) wow wan chaphrang wow e yarap kyllooid mynsien ya kiwa boon ki manyung.
Ynne ka sngi, ka seiñ hapoh i yahkhmat u President, u Kyrshan Blah wa u Secretary u Kmenlang Siangshai chirup wa ki dkhot da lai e yarap ki da u khoo, syllah wa u dai cha ki boon tylli ki manyung ha ka chnong Ladrymbai Khliehdupon, East Jaiñtia Hills deiwa bood ryntih ya ki kyndon wa da booh ka sorkar wei ha kani ka sngi ya ka seiñ da synraan lang da ki dkhot ka MPUF-Women’s Wing-EJHD.
U Kyrshan Blah hawa e yei klam ynne ka sngi da ong u wa ka seiñ dei mynsien wa sñiawkhia khamtam ha kam kini ki por wa em ka khang-sbak hapoh ka District waroh kawi yow khang yei poor ka khlam, neiliang ka seiñ kamwa man ha ki sngi wa dadep ka seiñ da leh ko yeini katwa joh i bor yong ka dei e yarap kyllooid mynsien ki dkhot yong ka.
Chooh chooh da pynrap u wa kam ha kini ki por wa ymyoh de ki bru wow lai khih lai kreh, ki paidbah wa boon wa lang da chem chitom bha ki khamtam kitu kiwa tymbuiñ hei yoh i la wei ini waroh iwa da pynman i ya ki wow lai e yarap cha kini ki bru.
Heijooh i por u Kyrshan da kyntu u leh ya kiwi ki seiñbhalang wa em hapoh ka jylla wow lai e yarap kyllooid mynsien ki ya kiwi ki para doh para snaam kam ha kani ka por wa emkaam yei yarap iwa mar kylliang.
