Neiliang ka KSU Thadmuthlong Pyllun Unit da beiñ joor ko ya ki wakreh ka Ialong Tollgate wa ynnin ka 23 tarik heiwa heipor 10:30 i miet uwi u dkhot yong ka uwa tip kam u Medarious Lyngdoh uwa wan na Byrnihat da ka Truck Dumper (ML04C7252) hadien wa wan pynhaap mar u, da chah dut u manda poi ha kani ka Tollgate.
Ka seiñ da pyntip ko wa hadien wa poi u ha Tollgate, u dkhot ka seiñ da yaklam u wa ki wakreh ka Tollgate hajrong i dor wei neidaw wa ki wakreh ka Tollgate da muaid ki, ym ap de ki yeiwa ong u heiwa da sdang ki wow dat oo hadooh wym ye de u wow klam. Da pyntip leh wa u dkhot ka seiñ ym toh wym bien u su ya ka dan.
Ha ini i por, uwa bood lang wa u Medarious da pyntip u wut wut cha u tre kari uwa da wan cha Ialong Tollgate wei ki wakreh kani ka Tollgate da dat won ki sa ya oo.
Kamtæ u tre kari da yut u na ini i thaw yow lai pyntip cha ki pulit ka Phramer.
Ki pulit hadien wa wan ki cha ini i thaw da pynkit ki ya uwa chah dat cha Jowai Civil Hospital, Ialong yow chah sumaar.
Neiliang ka seiñ da maham joor ko ya ki wakreh ka Tollgate wa lada jia wei dang myllien ki wow tba kti ya ki jaitbru yong i neini chakhmat, ka seiñ ym chong kli kti ko wei daw pynchitom ko ya ki katkam ki kaam yong ki neibhah ini da jia i man-i-por wei ki tre ki Tollgate daw hap ki wow chim yei bahkhlieh lada jia iyi iyi.
Hawa kylli na u SP ka West Jaiñtia Hills ya ini i jia, da ong u wa da em i ya kajia wa khian neidaw wa uwa yah Truck toh wa muaid wei ym em kiwon kiwon ki seiñ wa em heipor itai i jia.
