Heiyatoh wa i pynbaad ka TUR wa ym em yoh ya ka poisa yarap neibynta kiwa mylla kiwa da dooh wow lai khih lai kreh ynnin u snem neidaw wa em ka Lockdown deiwa wa ong wa em kiwa yoh wei em ki wym yoh wei em leh kiwa yoh du chi bhah donhi ya kani ka poisa.
Neiliang u symbood montri rangbah ynne ka sngi da ong u wa ka TUR da yahbakla ko ya ki paidbah ka jylla, deiwa ong wa ha itu i por hawa ki paidbah da chah ktah i yoh i kot ki neidaw ka Lockdown, neiliang ka sorkar da wan ko chakhmat wow e yarap da ka poisa deiwa booh leh ki laad pyntip cha ka sorkar da ki Helpline kamjooh deiwa pyntip da ki waheh chnong.
Da pyntip u wa ynnin u snem da em 2,33,194 ngut kiwa da yaleh wow yoh ya kani ka poisa yarap iwa da pynkit ha ka NIC yow pynsakhiat ya kiwi pa kiwi ki pyrtuid wa toh hok wow yoh ya ka poisa heiwa na kini da chem wa da em 1,81,481 ngut kiwa da em hok wow yoh ya ini i yarap poisa ka sorkar heiwa hadooh ynne ka sngi da phah ya ka poisa cha ki 1,45,161 ngut katwa ya ki 36,330 ngut dang phah poisa hadooh katni.
Kamtæ da ong u wa i kam ka TUR toh iwa yah bakla ya ki paidbah deiwa ong leh ha i jooh i por wa ka sorkar ka pdiang ko ya iwon iwon i beiñ i booh neibynta i bha i miat tangwa ym toh wow pynbaad hi eh.
Da pynche u leh wa kitu ki wym yoh yarap toh kiwa kreh kam ki Casual Employee, kiwa em ya ka Card Rachon AAY wa PHH, kiwa kreh ya ki kaam 100 sngi wa kitu kiwa mylla kiwa da yoh yarap chwa,
Da pyntip u leh wa da dep pynlut T. 30,31,46,200 wei kawa dang sah wow su toh T. 7.5 klur.
Kitu ki wakreh mylla kiwa da tipmit da ka sorkar hadooh u Wisu (Mar), 2000 da yoh ki T. 5000 samen kiwa em 25,794 ngut heiwa waroh da yoh lut ki ya ka poisa kawa da poi T. 12,89,70,000. Ya kini ki wareh wa da em pyrtuid hapoh ka sorkar hap ki wow pynthymme chisien chi snem hei dor wa T. 60 wei ha iwa khaddooh wa da wan pynthymme da em kamwa 70,000 ngut kiwa da leh ya ini.
