I chitom Mucormycosis iwa yoh na u khñiang (Fungal Infection) toh iwa da sdang yoo katni ha kitu kiwa dang chait wa kiwa sdang chait na u COVID-19 kiwa da sdang boon tangwa ym toh won iwa poor namo iwa yabi na uwi cha uwi kamwa yabi u COVID-19. Ya ini da ong da u Dr. Randeep Guleria, Director, AIIMS, New Delhi hawa yaklam wa ki laad pathai khubor ha National Media Centre, PIB Delhi ynnin ka sngi.
Da ong u wa ini i kjut ym toh iwa tip kam i Black Fungus Infection kamwa da em wa sdang wow khut ki wei kiwa yoh ya uni u khñiang toh 90-95% kiwa em kjut chini (Diabetes) wa kiwa dih dawai Steroids.
U Dr. Guleria da ong u wa lada pynemkaam yei pyrtuid Black Fungus hawa yaklam ya i Mucormycosis, daw wanrah ko yei sñiawthooh bakla neibhah u Black Fungus toh uwi hi u jait wei da em wa sdang wow pynemkaam ya ini i pyrtuid deilang wa u Mucormycosis neidaw wa em ki thoh broi rong yong napyrdi ki thoh broi rong lieh. Ha kiwa boon ki jait khñiang wa yoh (Fungal Infection) toh kiwa tip kam ki Candida, Aspergillosis, Cryptococcus, Histoplasmosis wa Coccidioidomycosis. U Mucormycosis, Candida wa Aspergillosis toh kiwa yoh ki bru kiwa da tlot i bor i doh yong ki wow leh pyrchah yei kjut.
Kiwa yoh ya u Mucormycosis em ki ya ki dak ki chin deiwa ad chilliang i ngap, i kjut khlieh, i kset khmut, i mih kha hapoh khmut wa ktien iwa dang joor kat dang lai i por wa i iñdoh.
U Dr. Guleria da ong u leh wa kiwa yoh ya u Candida Fungal Infection, ki dak ki chin toh iwa mih ki bynta wa kylla rong lieh hapoh ktien wa ha u thylliej, ye i leh wow ktah ya ki bynta man chynrang, man kynthai wei lada sdang chem wa em hapoh i snam da man i chah ktah iwa da joor bha.
U khñiang Aspergillosis won ym toh uwa boon wa yoh wei ktah u ya i sner deiwa siam thlu ki. Iwa boon wa chem ha kiwa yoh COVID-19 toh u Mucormycosis; u Aspergillosis kattu katni sien katwa u Candida won toh du ha ki kattu katni ngut ki bru.
Hawa klam chaphang kiwa em hei maa wow yoh ya u khñiang Mucormycosis, u Dr. Guleria da ong u wa 90%-95% na kiwa yoh ya u Mucormycosis toh kiwa em kjut chini lane kiwa dih dawai Steroids.
Ki jait Mucormycosis
Ya u Mucormycosis da yabah deiwa pait ya kiwon ki bynta i doh ktah u wei ki dak ki chin leh phær ki iwa chong ha iwon i bynta i doh ktah u.
Rhino Orbital Cerebral Mucormycosis: Ini ktah i ya i thaw wa em i pyllung khmat, i khmut wa i ktein iwa ye u poor chadooh cha i jabieñ. Ki dak ki chin toh i kjut khlieh, i kset khmut, i mih sakhmut da i rong yirngam, i mih snam khmut, i ad ki ngab, i wiar i sñiaw ha khmat wei kylla rong i sniehdoh.
Pulmonary Mucormycosis: Ini toh iwa ktah ya ki sner. Iwa wanrah yei iñdoh, i kjut rupai, i ky’oh wei mih snam manda ky’oh.
Ym em chem yei emyatoh i e Oxygen hawa e sumaar
“Da chem wa da em kiwa chah sumaar ha yung kiwa ym em pynemkaam Oxygen Therapy, wa ki leh yoh ki ya u Mucormycosis. Kamtæ ini pynyoo ko wa ym em yatoh i e Oxygen wa kiwa yoh ya uni u khñiang,” da ong u Dr. Guleria.
I sumaar
I e sumaar wa tip kam i Anti-fungal Treatment toh iwa neh boon tayaw iwa da booh yei eh ya ki Hospital, neidaw wa kiwa yoh COVID-19 ym man wow booh lang ki wa kitu kiwa ym em yoh COVID-19 tangwa kiwa yoh Mucormycosis hap ki wow booh ki ha ki jar jiar ki bynta ka Hospital.
Kamtæ i lehkhooid man i iwa emkaam bha ya kiwa em kjut chini yow khanglaad nei yoh ya uni u khñiang. Ya kitu kiwa pynemkaam ya ki Oxygen Concentrators, toh u pyntikna ki wa pynkhooid ya ki Humidifiers dei langær.
