Ki dkhot ka Khooid Ya Ka Wah Myntdu ynne ka 25 tarik, hapoh i yahkhmat u President, u Khroo Lamsalanki Pariat dei sñiawkhia ya i kylla rong ka Wah Myntdu du mar ya slap, da pynman noh ko dei booddien ya ki bynta u sarok Jowai-Amlarem kawa man ka thaw wa khloh ya ki loom neibynta wow chna pynheh ya uni sarok nadooh Treiongriang hadooh Lad Demthring.
Ha ini i lai pait ki dkhot da chem wa chilynter ki bynta wa chna pynheh ya u sarok da theh khiar ya i khyndaw iwa da man i daw wa kongsan yeini i kylla rong ka wah mar ya slap.
U Khroo Lamsalanki Pariat da ong u wa ini i noh khiar ya i khyndaw hapoh i pait ka yung krehkaam u Executive Engineer PWD (NH) Jowai Central Division, Jowai kawa pynkreh ya uni u sarok, da pyntip u wa katkam wa phah ki bor sorkar ha ka thong wow yada ya ka Wah Myntdu da phah wa ymtoh wow noh khiar ki ya i khyndaw cha ki riat khamtam cha liang ka Wah Myntdu neibhah ini daw ktah i ya ka mar ya slap, tangwa ymtip neiyi i daw wa kini ki kyndon wa da booh ym em wa bood ya ki iwa daw ktah ya kani ka wah kawa psa ya ki chnong wa ha talawiar wa kai ko.
Chooh chooh u Khroo Lamsalanki Pariat, da ong u wa ka seiñ dadep thoh ko cha u Deputy Commissioner, West Jaiñtia Hills District heiwa da kyrpaad wow chimkhia wow leh yeiwa emkaam wow yada ya ka Wah Myntdu khnang wow lait na i maa iwa ye wow tynyap ya kani ka wah.
Ka seiñ da ong ko leh wa lada ki chnat krehkaam ka sorkar ym pait ki yeini i chah pynsih ka Wah Myntdu, daw leh ko deiwa emkaam wot wow lai ujor ko wot cha ka yung bichaar.
