I khang chnong hapoh Meghalaya kamjooh ha Ri-loom Jaiñtia ha uni u snem da man sakhiat ko i tim yei rukom im wa dap du dei sier mynsien ya kiwa boon ki bei ki pa kiwa hap wow pyndap pynbiang yeiwa emkaam ha yung ha sem khamtam ya u kup chiliang, u sem chiliang uwa im na kti ha ktien.
U Paila Kordor Lyngkot, President yong ka All Jaintia Commercial Vehicle Association (AJCVA), ka seiñ kiwa kamai kari hapoh Ri-loom Jaintia da ong u wa dap u dei mynsien wa sñiawkhia hawa pyrkhat ya kiwa khih mylla khamtam ya kiwa yah kari waroh kiwa im jakpoh dei kaam kamai. “Nadooh wa sdang ka khang chnong khang thaw neidaw u COVID-19 da ktah sakhiat ko hadooh kattæ kattæ ya ki kaam kamai kari hapoh Ri-loom Jaiñtia kamjooh leh ha waroh kawi ka jylla Meghalaya. Kiwa yah kari waroh da dooh thiah dooh dem ki kammon wow pyntoh pyntne wow pyndap baam pyndap dih ya ki khon ki kti yong ki ha kini ki por khang chnong neibhah wym yoh de ki u lai kamai kari kamwa jooh lai ki man-ka-sngi,” da ong u Paila deiwa pynrap wa najrong wa hap maad ya ini i eh ha yung ha sem wei kammon wow thooh laad thooh luti yow lait yap thngan, hap i leh u pyrkhat khuslai sa ya ki kot ki sla kari kiwa hap i wow su dan da ki phaw hajar neibhah boonsien ka sorkar wym jooh pyrkhat wym jooh maap ko ki heiyatoh wa i su kot kari.
U Paila da ong u wa lada ha ini i rukom, yoosar ka sorkar hun ko wow yap thngan i khlem i yoo wyrai. Cheiwon u poi ka mynried yong i lada ka sorkar ym e yarap ko ya i khamtham ha kam kini ki por? Neiwon wow yoh poisa i su kot kari hawa tang u lai kamai ym yoh laad neibhah tang i ja wow bam i leh hap i dei baam antaad kat u kdang donhi.
Chooh chooh u Paila Kordor Lyngkot da ong u hawa i kam kiwa mylla da ya krehlang i wa ki bor sorkar, ym em hok i mo u yoh yarap? I da sangeh i u lai kamai neibhah burom i ya ka aiñ sorkar wa hap i chong yung khnang wow ye pynduna ya i poor u khñiang COVID-19, ka sorkar leh toh u pyrkhat ko deiwa thooh ki laad ki luti kammon wow pynchna wow yarap ya i wow lait i na kini ki kaam chah thngan namo ka sorkar hun ko mo u pait wa yap i hawa ngait i ya ki kyndon wa da booh ko!
Neiliang ka Association kawa pait ya i bha i miat kiwa khih mylla khamtam ya kiwa yah kari waroh kiwa em hapoh Ri-loom Jaiñtia wa kiwa em hapoh Meghalaya kamjooh, da kyntu joor ko ya ka sorkar wow sñiawbha ko u e yarap rap smat ya kiwa yah kari waroh kiwa toh hok wow yoh yarap. Ka Association da kyrpaad ko leh ya ka sorkar Meghalaya wow sñiawbha ko u maap ya waroh ki dan (Tax) kiwa hap su ya ki kot ki sla yong ki kari kamai neibynta yong uni u snem 2021.
