Ka United Nations kawa man ka seiñ yong ki ri ka pyrthai, ynne ka sngi da pynkup burom ko ya ki le ngut ki nong India kiwa da dooh yei mynsien yong ki ha u 2020 heipor wa kreh wow wanrah yei chongsuk (Peacekeeping) ha kylleiñ ki ri ka pyrthai.
Kini ki le ngut ki Indian Peacekeeper kiwa da dooh yei mynsien yong ki toh u Corporal Yuvraj Singh uwa e chakri ha United Nations Mission ha South Sudan (UNMISS) wa ki ar ngut ki bru paidbah wa kynthup ya u Ivan Michael Picardo uwa kreh ha UNMISS wa u Mulchand Yadav, uwa kreh ha ka UN Assistance Mission ha Iraq.
Ya kini ki le ngut da pynkup burom da ka Dag Hammarskjold Medal ha ka yalang wa pynman neibynta ka International Day of United Nations Peacekeepers kawa haap mynstep ka 29 tarik.
Ha u 2020 da em 129 ngut ki chipai wa ki bru paidbah kiwa da dooh yei mynsien yong ki heipor wa kreh ki neibynta ki UN Peacekeeping Missions ha kylleiñ ka pyrthai.
Nadooh nachwa ka India da embynta bha ko wow kreh wow wanrah yei chongsuk neibynta ka UN heiwa katni da em 5,500 ngut na ka ri kiwa kreh neibynta i jooh ha Cyprus, Congo, Lebanon, Middle East, Somalia, South Sudan wa kiwi kiwi ki ri.
Neiliang u TS Tirumurti uwa man kam u Ambassador ka India cha UN, New York, da e u i sñawngooh ya ki chipai ka ri kiwa da e chakri ya ka UN kattu la palat 60 snem wow wanrah yei chongsuk ha kylleiñ ka pyrthai.
Neiliang u António Manuel Guterres uwa man u Secretary General ka United Nations da ong u wa ynne da e hadooh 129 tylli ki Dag Hammarskjöld Medal cha ki 129 ngut ki UN Peacekeepers kiwa da khlaad heipor wa kreh ki wei yeini ymye de wow mylliñ ya ki.
