Ynnin ka sngi hawa yaklam u symbood montri rangbah ka jylla u Prestone Tynsong wa ki laad pathai khubor ha Shillong yow khana ya ki kaam wa da leh ka sorkar heiyatoh wa ka khlam. Neiliang ka Trained Psychotherapeutic Professionals of Meghalaya (TPPM) kawa man ka seiñ ki bru wa da pyndep yaka puræ puthi hei e syllok ya ki bru wa emkaam yarap hei bor pyrkhat pyrdaiñ, da khyrngiat ki ya ki kyntien wa klam u Prestone uwa ong “Some psychological problem”.
Ya ini da ong u hawa juba yeiwa kylli kammon da leh ka sorkar ya kitu kiwa yoh COVID-19 kiwa yut na ki Quarantine Centre yow ye ki u yachem neidaw wa man ki chi kurim heiwa ye ki wow pynpoor ya ka khlam deiwa leh ki kamni, neiliang u Prestone da jubab u deiwa ong wa ye u man wa kini ki bru ye ki wow em “Some psychological problem” iwa mut boi kini ki bru ye ki wow em chitom hei pyrkhat pyrdaiñ.
Ka TTPM da ong ko wa ini pynyoo kam uwa mihkhmat paidbah ym em u yei sñiaw yei long i man ki bru wei da toh u hiar chuki u neidaw wa na iwi i por cha iwi i por da klam u heitæ i rukom wa pynyoo wa ym sñiawthooh u yei chitom ki paidbah ha ini i por wa em ka khlam.
Kamtæ da ong wa kam ka seiñ kawa em ha ki kaam wa yatoh wa i chait i khiah i pyrkhat pyrdaiñ man-ka-sngi, da chem ki wa ini i klam u Prestone toh kamwa klambeiñ wei yoobeiñ ya kitu kiwa chitom, kiwa yaleh yow jop yei chitom yong ki wei ya ki bru wa chitom kamni ini i klam u Prestone pynyoo ko leh yei long i man ka synchaar khadar i wym kheiñkor yei mynsien bru.
Chooh chooh ka TTPM da ong ko wa neibynta kitu kiwa ka imlang sahlang ym bna ko wei ym em wa sñiawthooh ki heiwa dang boon kiwa chah paitkhmat kiwa chah sñiawthooh bakla hawa yatoh wa i chait i khiah i pyrkhat pyrdaiñ, ka seiñ u pteiñ ko wow yaleh ya ini yow lait ki bru wow klam chaphang yong ki khlem da pyrkhat arsien.
Kamtæ da ong wa u Montri toh u yah u nakhmat yow pynman ya ki pynsñiawthooh paidbah hajrong ka Mental Health yow lait u leh u yoo manbiej mynstep mankawi.
