Katkam ka yutip wa da yoh da em biang i jia wa sñiawsih heiyatoh wa i kaam tih mooyong ha East Jaiñtia Hills heiwa da em kamwa 6 ngut kiwa khih mooyong ha thaaiñ Sutnga da suba toh kiwa da sahkut hapoh kawi ka krem tih mooyong wei kini ki bru toh kiwa na Assam.
Katkam ka yutip wa da yoh, i thaw wa jia toh iwa dang em hapoh ka Umpleng Anti Dacoity Camp heiwa ki pulit ka East Jaiñtia deilang wa u SP da lai ki cha ini i thaw wa jia.
Ini i thaw wa jia toh iwa jngai kamwa 1 Km na yaw Umpleng ha u sarok lai Saipung hajan Lelad.
Ym em u che wa ynnu jia ini heiwa uwi na ki bru wa kam toh uwa tipmit ya uwi na kini kiwa tih mooyong, da ong u wa da yap u hapoh ini i krem mooyong, da ong u leh wa yei metyap toh iwa em hapoh ka krem mooyong wa yillu da ki spah phut heiwa yei metyap ym pu em sai kattu la 2 sngi.
Katkam wa pyntip won ki pulit ka Meghalaya da ong ki wa ini i krem mooyong toh iwa me cha kdoong cha chmiang ka thaaiñ Sutnga wei da sdang yow thooh yow chem wei wow pynlait ya kiwa tih mooyong.
Neiliang ki pulit ka Assam da paan yarap ki na ki pulit ka East Jaiñtia heiyatoh wa ini i jia wei wow leh yeiwa emkaam.
