Ka Hynniewtrep Achik National Movement (HANM) Jaiñtia Zone da kyntu ya kiwa mihkhmat ka Ri-loom Jaiñtia wa Khasi wow khyrngiat yongbru noh nadooh myntu ka sngi khnang wow lait ki khon ki ksu u pynbaad ya ki hadien habood heiyatoh wa i roi i paar neibhah kamwa man katni da sakhi wa waroh ki kaam pynroi da lai lut ki cha Ri-loom Garo.
Da kdaw ko wa wot ki chnat ka sorkar kam ka MeECL kiwa em ki Sub-station ha Jaiñtia wa Khasi ka sorkar wa yahkhmat da u Conrad Sangma da ekti noh cha ki Company wow pynlai ya ki iwa da pyndooh mynsien ya ki khynroo khyllood wow yoh khih yoh kreh ki.
Da kylli ko leh wa neiyi i daw wa kwah ko wow ekti du ya ki Substation ka MeECL kiwa em ha Khasi Jaiñtia katwa ha Ri-loom Garo ym em kawi wot leh ka Substation wa thmu wow ekti ya ki deiwa dawa ya u Conrad Sangma wow pynche paidbah yeini waroh.
Ka seiñ da ong ko wa em iyi iyi cha lyndet heiwa ka sorkar kwah ko u ekti ya ki Substation wa ka Leshka Hydroproject cha ki Company wei yoo kamwa em iyi iyi cha lyndet yong ini i thmu.
Chooh chooh ka HANM da dawa joor ko na ka sorkar wow sangeh noh u lilam ya ka MeECL wa kiwi ki thaw pynmih bordiñ cha ki Company samen.
