Ka sorkar ka nongbah Delhi hadien wa da sakhi ko yei sdang duna kiwa chah ktah ha u COVID-19 nadooh wa sdang wan biang kani ka khlam ha ka wot kawa ar ha u Wisu wa Naitung, heiwa ha kini ki 24 kynta wa da lai da em du 381 ngut kiwa dang yoh thymme ya uni u khñiang kjut iwa man iwa duna dooh ha kini ki le bnai wa dadep, neiliang ka sorkar da rai ko wow sdang biang u wai ya ka nongbah.
Ha kini ki 24 kynta da em kamwa 1,200 ngut kiwa da chait wei 34 ngut kiwa da khlaad na kani ka khlam ha nongbah.
Waroh kiwa dang chah ktah da em ki 5,889 ngut wei na ki 76,857 tylli ki Test kiwa da leh ha ki 24 kynta 55,786 toh da ka RT-PCR/CBNAAT/TrueNat katwa 21,071 toh lyngba ka Rapid Antigen Test.
Kiwa chong kset ha yung namo ki Home Isolation da em ki 2,300 ngut donhi.
Kam wow pynkynmoo heini ka nongbah New Delhi hadien wa sdang ku kiwa chah ktah ha ka khlam nadooh wa sdang kani ka la-ær kawa ar da pynkrehkaam ko ya ka Lockdown nadooh ka 19 Naitung (Apr) wei nadooh mynstep ka 7 tarik u sdang wai biang ya ki dukan kamjooh leh ki yung krehkaam ka sorkar wa ka yong ki bru samen heiwa u chah du 50% ki wakreh wow wan ki.
Kam wow kdaw heini, ka sngi wa boon dooh kiwa dang chah ktah thymme ha ka chi sngi ha nongbah em ki 37,000 ngut.
Da em leh palat 58,000 ngut kiwa da yoh tika ha ki 24 kynta wa da lai wei waroh kiwa da yoh tika ha ka nongbah da em ki 5,650,819 ngut hanla da pynsangeh chwa yei e tika ya kiwa 18-44 snem i rta neidaw wa duna ki dawai heiwa da kyntu leh ya ka sorkar pyrdi wow thooh ki laad wow pyndap yei emkaam ya ki.
