Ka sorkar lyngba ka University Grants Commission da chah ko ya kiwa lai puræ wow chim ya ka NCC (National Cadet Corps) wow man ko kam ka Elective Subject ha ki College.
Ini daw yarap ko khamtam ya kitu kiwa em ha ki thaaiñ khappood heiwa da e bor wow pynman ya ki NCC kam ki bor wow embynta lang ki hapoh ka Border Areas Expansion Plan yow yarap wow tei ya ka ri.
Ki kyndon wa emkaam da dep phah da ka UGC cha ki Vice-Chancellor yong waroh ki University ha ka 15-04-21 yow pynman ya ka NCC kam ka General Elective Credit Course (GECC) katkam wa tyrwa da ka Directorate General National Cadet Corps, New Delhi, heiwa 91 tylli ki College da dep ki wow pynkrehkaam ya ini.
Ka NCC Syllabus neibynta ka B wa C Certificates da pynkhreh katkam ka Choice Based Credit System (CBCS) ka National Education Policy 2020 deiwa e 24 Credit Points ha ki 6 tylli ki Semester. Ya ini da leh kam chibynta ka National Education Policy 2020 heiwa kiwa lai puræ ye ki wow jied da ki yong ki hi ki Subject heithaw wow sahkut du ha kitu ki Subject wa da tyrwa da ki thaw puræ.
Hadien wa dep puræ ya kani ka Course, daw yoh ya ki Credit Points iwa daw yarap wow pyndep ya ki Degree wa lai puræ.
Da yaleh katwa ye da ka NCC Group HQ Shillong, yow pynkrehkaam ya ka NCC wow man ko kam ka Elective Subject ha ki College wa da tipmit da ka NEHU. Kamtæ da leh ya iwa emkaam wow pyntip ya ini wa ka NEHU, heiwa ka University da pynyoo ko yei mon wei dang pyrkhat ko ya ini.
