Kat dang lai ki sngi i khoom i kdoh wow khang ya i poor ka khlam COVID-19 dang ktah i leh ya kiwa khih mylla wa kiwa chongdai ha kylleiñ ka Ri-loom Jaiñtia.
Ynne ka sngi da yoh u yaklam wa ki kattu katni ngut kiwa chong dai dukan ha Iawthymme, Jowai heiwa da pynsñiaw ki yei mynsien wa khia hajrong ini i khang ya ki dukan neibhah wa kiwi ki dukan da chah wow wai ki 2-3 sien chi tayaw.
Kawi na ki manbei kawa chongdai ha Iawthymme, kawa man leh ka dkhot ka RJTA, ka Nidalam Dkhar da ong ko wa kam kiwa chongdai da chem chitom bha ki wei boon kiwa yap thngan deiwa kdaw wa ha u snem wa dadep wa em ka Lockdown da chah wow chongdai ya ki ha ki dong wa ki chnong tangwa ha uni u snem won ka Lockdown da man ko kam ka Lockdown khon-kchu katwa kiwa mahajon donhi kiwa yoh u wai dukan aw jan waroh chi bnai wei da ong ko wa ka sorkar da toh u chah ko wow wai ki kattu katni sngi khnang wow lait ware ki u chah ktah.
Neiliang u Paila Lyngkot uwa man u President ka Ri-loom Jaiñtia Traders Association (RJTA) da ong u wa hadien wa khangsbak ka sorkar da chong yalang wa kiwa chongdai nadooh kiwa dai sula, kiwa dai jhoor wa kiwi kiwi wow pyrkhat kammon wow leh neini chaphrang.
Da ong u wa lada ka sorkar ympu chah ko wow chong dai wot hadien ka 14 tarik neiliang ka seiñ daw mih ko chaphrang wow chongdai kamwa jooh man neibhah ki leh emkaam ki wow pyndap wei wow psa ya ki khon ki kti yong ki, deiwa pynrap leh wa ka sorkar da toh u chah ko u wai da ki Odd/Even namo wow chah u wai ki dukan kamwa 2-3 sien chi tayaw.
Kawi ka manbei, ka Oiberly Suchiang da ong ko wa da ksohkti lang ki wa ka RJTA neibhah ki bru ym yap ki na u COVID-19 tangwa u yap ki nei thngan neibhah ini i leh ka sorkar wow chah u wai du ya ki kttu katni tylli ki dukan heh da ktah bha i ya kiwa dooh. Da ong ko leh wa ini da man kamwa phon chakæ ya ki paidbah neibhah na ka 7 tarik da rah pa rah tarik cha ka 14 tarik boi na ka 14 daw pteiñ ma pteiñ biang i khang neibhah kamwa man hi kiwa boon kiwa chongdai hadien wa dep pynkhreh mar ki da phah khang ya ki wei ini da wanrah i yei doohnong wa khroo ya ki.
Sa kawi ka manbei dei mynsien wa sñiawkhia da ong ko wa lada ka sorkar ym chah ko u wai kamwa da booh sngi ko (14 tarik), neiliang yong ki ym yohsa de ki wow mih u chongdai neibhah katkam wa man katni ymye de ki wow pyndap yeiwa emkaam ki khon yong ki.
Kawi won ka manbei kawa chong dai jhoor, da ong ko wa hadien wa krehkaam ka Lockdown na ki snem wa da dep da chong sakhiat ki ha yung wei ki jhoor leh da py’ut da sepai ki khlem em iwon iwon i yarap na ka sorkar wei lada ka sorkar ym wai ko ha ka 15-16 tarik daw mih ki wow lai chongdai dei bor.
Heiyatoh wa i lang i jhep ha Iawthymme, neiliang u Paila da phylla u wa kammon mih ini i jhep hawa ka sorkar da pynkrehkaam ko ya i khang chnong, deiwa ong wa ini i jhep ye u wow man na ki jhoor ki soh kiwa noh kiwa chong dai neidaw wa da sih kini ki mar. Da dawa u wa ka sorkar wa ka District Council wow leh yeiwa emkaam hajrong ini waroh.
