Neidaw wa pteiñ i ku kiwa yoh COVID-19 ha West Jaiñtia Hills heiwa na kiwa chah Test kiwa yoh ya uni u khñiang da em ki 33% haka 3-9 tarik uni u bnai iwa tip leh kam ka Positivity Rate, kamtæ u District Magistrate ka West Jaiñtia Hills da pynmih hukum u ynne ka 12 tarik yow pteiñ ya ka TOTAL CURFEW hapoh waroh ka District chisyndon hadooh wa pynbna da kamwi.
Kamtæ heipor wa em ka Total Curfew ym chah wow lai na kawi ka District cha kawi lait noh kitu ki kari wa lai luti cha Assam/Tripura/Manipur/Mizoram wei ym chah wow sangeh ki ha kiwon kiwon ki thaw wa em ki chnong wa em bru ha tymbud u NH-06 wa haap hapoh u pood u ang ka West Jaiñtia Hills.
Da khang leh yei lai na kawi ka District cha kawi kamjooh u lai pyn hapoh ka District. Ym chah ya kiwon kiwon wow mih cha lait lada ym em i daw wa biang. Ki kari wa mih khlem ki Pass daw chah pynchitom ki wei kiwon kiwon kiwa leh pyrchah daw ye ki u chah kem.
Da khang leh wow pynman ya kiwon kiwon ki jait yalang paidbah, ki Conference wa ki e sikai (Training).
Ym chah yei psiah kiwa uiñke suwari kiwa na baar jylla wei waroh ki thaw uiñke suwari toh u man ki kiwa khang.
Ki kaam yalehke Sport waroh toh u man ki kiwa khang.
Waroh ki thaw puræ puthi, Coaching, Training Institutes wa kiwi kiwi u man ki kiwa khang. Tangwa ha kini ki por waroh ki thaw puræ toh u e sikai ki lyngba ka Online Teaching.
Waroh ki yaw wa jooh pynman chisien chi tayaw u man ki kiwa khang.
Waroh ki yung niam wa ki thaw mane Blai u man ki kiwa khang.
Waroh ki yung krehkaam ki bru samen u man ki kiwa khang lait na kitu kiwa leh ya ki kaam wym hoi u dam namo ki Essential Services.
Ym chah wow pynman ya ki bia.
Waroh ki khayi khappood lyngba ka Tamabil Dawki toh kiwa da pynsangeh.
Ki Hotel, Restaurant, ki dukan cha, dukan ja u krehkaam ki du deiwa song baam donhi, ym chah wow chong baam.
Ki kaam chna yung yong ki bru samen kamjooh ki yong ka sorkar kiwa em ki bru wakreh pyn hei thaw chna, kiwa ym emkaam wow wanrah bru na kiwi ki thaw toh kiwa da chah wow leh deiwa yoh bor chwa na u DC lane na u SDO(C) Amlarem.
Chah hi wow leh ya ki kaam E-Commerce, Courier Service, Home Delivery deiwa yoh bor na u Deputy Commissioner/Sub-Divisional Officer(C) Amlarem.
Ki dukan Hardware u chah u wai ki katkam wa emkaam deiwa yoh bor na u DC lane na u SDO(C) Amlarem.
Ki karkhana chna kari wa ki dukan dai tiar kari u chah u wai ki du heipor wa emkaam deiwa yoh bor chwa na u DC lane u SDO(C) Amlarem.
Waroh ki dukan wa dai khutia ya ki marbaam mardih ha ki dong ki chnong (kiwa ym toh hapoh ki Containment Zone) u wai ki ha ka sngi Monday wa Wednesday nadooh 9:00 waje i step hadooh 4:00 waje i janmiet. KI CCMC da e bor ya ki wow chah u wai ki dukan kitu kiwa da yoh tika COVID-19 hanla dang chisien leh wa kynthup ya kiwa chongdai wa ki wakreh.
I wai ki dukan dai Wholesale ya ki marbaam mardih wa emkaam ha Jowai, Mihmyntdu, Ialong wa Amlarem (kiwa ym toh hapoh Containment Zone) toh ha ka Tuesday wa Friday hapyrdi 9:00 waje i step hadooh 4:00 waje i janmiet. Ha Thadlaskeiñ Block wa Laskeiñ Block u wa ki ha ka sngi Wednesday hapyrdi 9:00 waje i step hadooh 4:00 waje i janmiet.
I wai ki dukan dai that, Electrical, dukan juti toh ha ka Wednesday hapyrdi ka 9:00 waje i step hadooh 4:00 waje i janmiet.
Ka yaw Lay-by Market wa em ha Ialong u wai ko ha ka Tuesday wa Friday nadooh 9:00 waje i step hadooh 4:00 waje i janmiet. U District Horticulture Officer wa ka Ialong Lay-by Market Committee daw pynbait ki yei rukom wai. Da e bor leh ya ka Committee wow e bhah ya ki thaw chongdai cha kitu kiwa da yoh tika COVID-19 hanla dang chisien yoh. Ki kari wa kit ya ki jhoor Wholesale ym chah wow psiah ki chapoh ka chnong Jowai.
Ki thaw wa leh Welding namo Steel Fabrication u wai ki hawa emkaam ha ka sngi Tuesday wa Friday hapyrdi 9:00 waje i step hadooh 4:00 waje i janmiet deiwa yoh bor chwa na u DC lane u SCO (C) Amlarem.
I wai ki dukan wa yatoh wa ka rep ka riang kam ki dukan wa dai ya ki kor rep, ki symbe, ki sboh wa kiwi kiwi u wai ki ha ka sngi Monday wa Thursday hapyrdi 9:00 waje i step hadooh 4:00 waje i janmiet deiwa yohbor na u DC lane SDO(C) Amlarem.
Ki Bank wa leh yaki kaam sorkar u wai ki nadooh ka Monday hadooh Friday hapyrdi 10:00 waje i step hadooh 4:00 waje i janmiet deiwa pynduna yaki bru wakreh. Katwa kiwi ki Bank u wai ki ha ka Monday, Wednesday wa Friday deiwa pynduna ya ki bru wakreh nadooh 10:00 waje i step hadooh 4:00 waje i janmiet.
Ki kaam wa chah u leh man ki kamni ha wah:
Ki kaam wa yatoh wa i chait i khiah, wa kynthup ya i lai e tika deiwa pynyoo ya ka COWIN Registration wa i ksoh yei bhah chim tika (Slot Booking). Ki kaam wa yatoh wa ki dawai dachin, ki Pharmacy, i lai i wan ki mar wa emkaam, i lai phah sumaar wa jhan, ki bru wa lai ya ki kaam sorkar, kamjooh kiwa lai ya ki kaam wa yatoh wa u COVID-19, ki pulit, ki chipai, ki Home Guards, ki Fire & Emergency Services, ki kaam bordiñ, ki kaam pynpoi um, ki kaam chna sarok chna yung (PWD, NHAI, NHIDCL), ki kaam Municipal, ki kaam wa yatoh wa i saam rachon, Information and Public Relations, Telecommunication Services, ki bru wa lai neibynta u chna ya ka Oxygen Plant ha MCH Jowai kiwa em ya ka Identity Card, ki laad pathai khubor, NARI/1917iTEAMS, ki Petrol Pump, i li booh tadong LPG, ki kaam wa yatoh wa ka MGNREGA ha ki thaw palatsor, ki kaam rep ha ki thaw palat sor (wa kynthup ya u kwai wa pathi), ki kaam wa yatoh wa ki mrad wa ri wa psan deilang wa ki baam yong ki, ki dukan rachon hap ki u pyntikna wa deiñ ya ki Mask, u yajngai uwi ya uwi 2 meter kamjooh wow lehkhooid ya ki kti.
Ki yung krehkaam ka sorkar jylla wa ka sorkar pyrdi u wai ki katkam ka hukum wa da dep pynmih.
Lada em i yap bru, u chah wow em 10 ngut donhi ki bru deiwa pyntip cha u DC ka District lane ha u SDO ka Amlarem.
Ha ki chnong wym em kiwa chah ktah ha u COVID-19 da chah wow leh ya waroh ki kaam rep.
Ya ki kaam wa jhan wa yatoh wa i chait i khiah wa i lai cha kiwi ki District yow kit ya ki mar wa emkaam, ye wow yaleh da ka ‘EPASS’ ha ka website www.westjaintiahills.gov.in.
Waroh ki kaam wa da chah toh kiwa hap wow bood katkam ki kyndon khamtam wow leh ya ka Social Distancing wa kiwi ki kyndon wa da pynmih na ki por cha ki por da ka chnat i chait i khiah ka sorkar Meghalaya.
