Soo ngut ki khynnah da dooh ki yei mynsien katwa arngut won da mynsoo joor ki hadien wa oor khyndaw iwa da ya rah ki yung ha Aizawl, Mizoram.
Ini da jia i hei miet ka sngi Thohdieñ heipor 9:30 i miet ha i dong Thuampui iwa haap hapoh ka Bawngkawn Police Station ka Aizawl.
I yung tin wa em 7 ngut da chah rah ha i chram wa haap hadien wa oor khyndaw.
6 ngut na ki 7 ngut kani ka yung da em ki hapoh ini i yung heipor wa jia ini heiwa 4 ngut ki khynnah kiwa em 3 hadooh 16 snem da khlaad ki pyn ha ini i thaw wa jia. U Lalbiakzuala (75 snem) da lait im wa sa uwi.
Ya ki metyap da sai deiwa ya krehlang ki pulit wa ki bru paidbah heiwa da sai khaddooh yei metyap yong ka kynthai wa 16 snem deilang wa kawa kha mynrap yong ka heipor 6 waje ynne i step.
3 ngut won kiwa sah ya i yung wa em ha wah da yoh ki wow yut hadien wa sñiaw ki yei ood wa oor i khyndaw.
Neiliang u Chief Minister ka jylla u Zoramthanga da phah u yei sñiawlem cha ka manyung kiwa da dooh yei mynsien kamjooh cha kiwa mynsoo ha ini i oor khyndaw iwa da jia neidaw wa joor slap.
