Da u: R Skhemroi Laloo
Kjut nood u pait ya ka jylla yong i,
La ha ki distrik næ ki chnong kiwi.
I’u pood u sam ym boi yaklam,
Da boon wa chah kjit wa chah lilam.
La ha Jwai næ ha nongkyndong,
Jaitbru da jan kylla khar khrong.
Sepai wa jied ya ki nongmihkhmat,
Mar dei kylla ya i da sympat.
Khubor kutjait wa mih wa spær,
Kut i klam tang ha la-ær.
Iawmusiang da sahteiñ da boon ki snem,
Du hei chah sngoh tyrnem.
Related posts
Wym em wa pait wym em wa yoo,
Kut i kwah du hei yimphoo.
Mynried ki khon dei yi u thooh laad,
Da ngam i stat, da joor ka syad.
Tyrha u khmied ya ka chnong lajong,
Nongpynlai da dap du i sarong.
Ym toh wa beiñ, ym toh wa kynnoh;
Da raw u chyoh, da thngan u kpoh.
Wyrchaw wa phi ym sñiaw kot bor,
Waroh u sñiooh khlieh sñiaw da tlor.
Nongmihkhmat da pait da sylli;
Ham ya rhah dooh ya ka chuki.
Pyrthai da che ya i ym slem de,
Ham ya leh khlot, ham ya leh swe.
Khih chitom hachwa u silet;
Ya poi i por wa duk u thoh da’u let.
Lynga u pait ya kiwa dooh wa duk,
Ha phi da chaniah yow yoh yei suk.
Ham joor i broh, ham joor i lehroh,
Khaddooh ya duk dei kynthih khroh.
