Ki Soodwar Sooluti watip deiwi i kyntien kam u Mookhai, Mooralong, Moosniang wa u Mootong deilang ka Syiem Myntdu wa kær talawiar yei chnong Jowai watip kam ka Tawiar Takan toh ki Blai Chnong Blai Raij kiwa da pynthiah pynchong da ka hukum adong blai chirrup wa ka niam nadooh wasdang ka Raij ka chnong.
Nadooh ka pateiñ wa da lai hadooh kani ka pateiñ wa katni katkam i sikai ka niam chisien chisnem chwa wow poi ki sngi ki tayaw yong ka Chaad Niam Behdieñkhlam, ka Raij Jowai katkam ka hukum adong u Trekirot hap pyndep ko yei e bhet e bhar, e bhah e bynta ya ki Soodwar Sooluti wa ya ka Tawiar Takan, kawa man ka dak i sñiawngooh makhane yei kyrkhu iwa da yoh wei kamjooh u ood u naam won yow e chooh chooh ki Blai Chnong Blai Raij yei yada yakær, chongsuk chongsaiñ, i miat i bha wei roi i par i phooh I pheiñ ka chnong ka raij ha waroh ki liang.
Ha uni u snem ya kani ka lehniam næ kñia e ngooh da pyndep ha ka sngi Muchai 17 tarik Naiynru wei chwa wow poi kani ka sngi u Dolloi, u Pator, u Langdoh, ki Sangot, ki Wasan wa ki waheh wasian ka Raij ku tyngkong ki ha yung Langdoh wow pyndep ya ka lehniam Dihsoopen neitæ ha ka sngi wabood won mih ki chakhmat ka yaw ka syiem wow e wyrta chula najrong ki Mooknor.
U Dolloi ka Elaka Jowai u waheh Puramon Kynjing hei e wyrta chula da khanna pynsñiaw wa ka lehniam Knia Khang ha uni u snem man ko kawa miat wabha katkam ki dak ki chin wa pynyoo ha ki knia yong waroh ki Soodwar Sooluti deilang wa ya ka Tawiar Takan. Chooh chooh u Dolloi e u leh i sñiawngooh ya waroh kiwa chongyaw chonghaat wa ki paidbah kiwa da noh kyllooid mynsien cha ka Khrong ka Tri kamjooh ya ki khon ka ka Raij ka chnong kiwa da emlang hei wow pynman ya kani ka lehniam kawa laibait lai ryntih neibynta i burom u Trekirot wa ki Blai Chnong Blai Raij.
