Ka yung krehkaam u Syiem ka Hima Mylliem ynne ka sngi ha chwa wow wai ya ka Ïewduh da lum ya ka yalang wa kiwa chongdai madan neibynta wow pynsñiawthooh ya i pynbait wa kammon wow bood ya ki kyndon hadien wa da e laad wow wai ya ki dukan hapoh yaw.
Neiliang yong ka Hima da chimkhia ko wow yoh biang yei e bor na ka sorkar wow wai ya ka Ïewduh wei da kyntu ya kiwa chong yaw wa toh u burom ki ya iyi wa ka sorkar da phah ko, hadien wa ka sorkar ynne da ap ko ya i kyrpaad wow chah u wai ya ka yaw.
Hawa pynche cha kiwa dai madan ha ka yalang kawa da pynman ha yaw dai yonglang ha i emlang ki Magistrate, u montri Kharlukhi da ong u wa ini i chah wow sdang dai madan ha Ïewduh u man ko nadooh mynstep ka ka sngi wei u man ko du ya kitu kiwa em pyrtuid wa ka Hima Mylliem.
Heiwa kiwa em pyrtuid wa ka Hima da em ki 550 ngut waroh, wei neiliang yong ka Hima da pynbait wa ha ka chi sngi u chah wow chong 184 ngut, heiwa daw e leh wow dieñ A, B wa C wow booh kylliang ya ki sngi chong yaw.
Neiliang yong u montri Langstieh da ban joor u wa kiwa chong yaw waroh toh u burom ki yeiwa phah ka sorkar yow lait na i chah khang biang, neibhah ka Ïewduh toh ka thaw kamai ym toh i yung wow leh katwa ngait.
Na ka yung krehkaam u Syiem ka Hima Mylliem da kyrpaad ko ya ki paidbah wa wan wow chong yaw wow sñiawbha wow chim yei tika neibynta i chngaaiñ ya idæ wa ka yung ka sem, neibhah lada ym yoh tika daw booh hei maa nyngkong ya idæ wa ya ka yung ka sem.
Ka Magistrate, ka B. Rani da ong ko wa i khut ya kani ka yalang ynne ka sngi man ko wow pynsñiawthooh wa toh u em i kitkhliehlang wa uwi pa uwi wa wan dai ha yaw, neibhah ka sorkar leh ka sñiawthooh ko wa ki paidbah ki emkaam ki ya ka kamai neibynta wow psa ya ki khon ki kti ha yung ha sem wot hapyrdi kani ka khlam.
Da ong ko wa i wai ya ka yaw ym em mut wa da chngaaiñ, tangwa wa ki paidbah u lait ki nei yap ja.
Neiliang yong ka Hima Mylliem wa ka KHADC daw booh ko chiboon ki bru wow pynbiang wow pynbait ya ki yada wow em i ya pynjngai, wei ki paidbah toh u sñiawthooh yei kreh chitom yong ki wei wow yarap bood ya iwa da phah.
Neiliang yong ka Magistrate da ong wa ya ki jhoor, ki dakha wa i doh ym pu chah, katwa ya kiwi ki jait dai, i por wow wai toh nadooh 9:00 waje i step hadooh 4:00 waje i janmiet wei lada em kiwa tyngkheiñ ya ki kyndon daw daiñ kuna wei hap wow khang biang leh ya ka yaw lada ki paidbah pynkheiñ kyndon ki.
