Ka seiñ Saiñdur Tipkur Tipkha Ieng Ehrngiew Khun Hynñiewtrep ya kawa da tip leh kam ka STIEH toh kawi na ki seiñ ki kynthai wa ki manbei na Ri-loom Jaiñtia kawa pait ya i eh i khoo wa i hok yong ki kynthai wa ki khynnah.
Ka STIEH da man ko leh kawi na ki seiñ kawa da kreh wow pyrchah ya i thmu wow tih moochuni ka Star Cement na Brichyrnot, East Jaiñtia Hills.
Ynne ka sngi ka Deiwi Tongper kawa na Elaka Narpuh kawa man leh kam ka President yong ka STIEH da phah ko ya i khubor wow pynsñiaw yei mynsien wa khia hajrong i yohbor ka Star Cement wow tih ya u moochuni na Brichyrnot, East Jaiñtia Hills khlem i pynman ya i pynsñiaw paidbah namo ka Public Hearing.
Ka Deiwi da ong ko wa man i iwa phylla heiwa kammon yohbor kani ka karkhana lyngba ka chnat Forest Department wa ong wa ym em ki mrad wa im ha ini i paar (tih moochuni) wa i trywa na ka Meghalaya State Pollution Control Board (MSPCB) wa na u DC heiwa da kyrpaad wow pynlait ya ka Star Cement na ka Public Hearing.
Da kylli ko leh wa kammon ka chnat Forest ka jylla pdiang ko ya ini i tih moochuni wa jngai i na kani ka khloo Narpuh Wildlife Sanctuary?
Da ong ko wa ini waroh i yohbor ka Star Cement toh i leh embor donhi ka sorkar jylla hapyrdi wa pep ma pep i pynsñiaw paidbah (Public Hearing) hajrong wa mih chiboon i pyrchah na kiwa boon wa lang ki chnong wa ki seiñbhalang.
Ka Deiwi da kylli ko leh wa kammon ye ka sorkar u ap du ya ka Brichyrnot khlem ap de ya kiwi ki dorbar chnong, ki seiñbhalang wa wot ki manbei manpa.
Da tieñsar ko leh deiwa ong wa lada kam heini tih Moochuni ka Star Cement yohbor ki karkhana khlem i pynsñiaw paidbah, kiwi ki kaam kam i pynmih bordiñ ha Wah Mynngot wa i tih Uranium ha South West Khasi Hills daw bood ki ya kani hi ka jooh ka luti.
