Ka JSU ynne ka sngi da phah noh ko da ka ujor cha ka NGT wa cha ka MoEF&CC wow pyndam noh ya ka Environmental Clearance ka Star Cement wa e da ka MoEF&CC na Delhi.
Ha ka ujor ka seiñ da ong ko wa ka Star Cement ym em hok ko wow yoh ya ka EC neibhah wa da lai lait ko ya ka pynsñiaw paidbah wei wa kani ka thaw tih moochuni em ko hachrooh ka Narpuh Wildlife Sanctury kawa du 1.4 Km wa na ka Eco-Sensitive Zone kawa du kamwa 0.25 Km na kani ka paar moochuni wei em ko ha ka chiboon ki mrad wa kyrpang kiwa em hei maa wow dooh noh na sla pyrthai (Endangered Species) kiwa im ha kini ki khloo wei manda tih moochuni daw pyntieñ wei daw beh ya kini ki mrad wei heijooh i por daw pynjakhlia ko leh ya ka Wah Lunar wa ka Wah Lukha wei em leh ka Umso Nallah ka wah dooid wa em hajan kani ka paar moochuni kawa tooid cha kini ki wah.
Ka seiñ da beiñ ko leh ya ka yung krehkaam u DC East Jaiñtia Hills District wa ya ka Meghalaya State Pollution Control Board ka sorkar jylla kawa da thoh wow yalam bakla ya ka MoEF&CC wow pynemkaam da ka Para 7 Stage 3 Clause(v) wow lait noh na i pynsñiaw paidbah namo ka Public Hearing neibhah wa da tip che ki wa boon kiwa pyrchah bar ya kiwa kyrchaan ya ini i thmu ka Star Cement wei u DC da e laad u ya ka Star Cement wow pynkhreh ko rap boon ki bru wow pynyoo wa kyrchaan ki ya ka heiwa kani ka karkhana da lai ko cha ki paidbah kiwa ymtip iyi iyi leh hajrong ini i thmu yong ka wow tih moochuni wow phah soi ya ki ya ki kot wa kyrchaan.
Ka seiñ da kylli ko leh ya u CEM ka JHADC wa neiyi i daw wym mih u chaphrang wow pynche hajrong ini i leh sop sop ka sorkar wa ka Star Cement wow yoh ya ka EC khlem burom de ya ki bor ka Council wa ya ka riti synchaar ka ri.
Ka seiñ da kyntu ko leh ya waroh ki khon u Ynñiaw Trep Ynñiaw Wasa wymtoh u suki hajrong kani ka phang neibhah lada kamni ya kiwi ki kaam leh daw chah thombor ha ka sorkar wei emkaam wow pyrkhat leh ya ki pyrsa, ki khon ki kti wa ka mynried yong ki.
