Ha ka 19 tarik uni u bnai, ka KSU Namdong Area Unit da e yarap ko da u khoo, u dai wa i phñiang baam cha ki manyung wa dooh wa duk ha Namdong-B wa Mukhnang kam chibynta wow kyrchaan lang ya ki para doh para snam ha kam kini ki por.
Ha ka jooh ka sngi, ki ar tylli ki chnat krehkaam yong ka KSU kiwa em ha khappood Assam wa kynthup ya ka Khanduli-Umshangiar Unit wa ka Lapangap Unit da lai e yarap ki da u khoo, u dai wa i phñiang baam cha ki manyung wa dooh wa duk ha ka chnong Khanduli wa haka chnong Lapangap wei ha ka jooh ka sngi ka Mookjat Unit da e yarap ko da ki marbaam iwa da u dai, u khoo wa phñiang baam cha ki manyung wa dooh wa duk.
Ha ka tayaw wa dep ka KSU Iooksi Unit da e sñiawbha ko da ki PPE cha ka Iooksi 5 Waheh neibynta wow yoh u pynemkaam haka Ambulance yong ka chnong.
Ki chnong kiwa haap hapoh ka Iooksi 5 Waheh toh ka Iooksi Iapkhla, Iooksi Kyanmynsar, Iooksi Tongkiad, Iooksi Prianh wa ka Iooksi Umdienglieng.
Ka Iooksi 5 Waheh em ko du kawi ka Ambulance hapoh ka chnong wei i em kani ka khlam da pynchem ko yei eh ya kiwa yahkhmat chnong wow pynkrehkaam ya katai ka Ambulance neidaw wa hap ki wow thied ya ki PPE khamtam hawa kit ya kiwa yoh COVID-19.
