Ha ini i por wa em i khoom i kdoh ya ki bru neidaw wa em ka khlam COVID-19, da boon ki manyung kiwa da chem chitom neidaw wym yoh de ki wow lai li khih li kreh kamwa jooh ha ki por wa dadep iwa da booh ya ki ha i eh i khoo wow pyndap yeiwa emkaam wa man-ka-sngi.
Ynne ka 20 tarik ka Seiñ Kynjei kawa man ka seiñ yong ki chi lok chirup wa uwi u khon ka Panhok Shylla da mih ki chaphrang wow e da ki marbaam cha ki manyung wa emkaam yarap ha Panaliar, Jowai.
Chwa wow e ya kini ki marbaam da em ka yalang ha Yungwalieh ka Dorbar Chnong Panaliar ya kawa da pynlai da u Asst. Waheh Chnong, u Phrangsngi Challam.
Da yoh ya i klam na u Lakhon laloo uwa man u Secretary ka seiñ uwa da khana kajiak chaphang ka seiñ wei da pyntip u wa kiwon kiwon ki yarap wa e ka seiñ toh iwa da pynlang wei da e yarap da ki dkhot yong ka.
U General Secretary ka Dorbar Chnong Panaliar u Careme Phawa da kyntu u ya kiwi ki seiñ wa ki bru samen wow em ki i mynsien wow yarap wei wow chaan kylliang ya kiwa tymbuiñ ym du katni tangwa ha kiwi tawon ki por leh.
Hadien wa dadep e yarap cha ki manyung ka Panaliar, neiliang ka seiñ da lai e ko ya ki marbaam ha Chiliangraij, Jowai heiwa ya kini ki marbaam da ekti ha u Waheh Chnong ka Chiliangraij u DH Pde wa kiwi kiwa kitkaam ka chnong khnang wow ye ki wow pynpoi ya kini ki marbaam cha ki manyung kiwa emkaam yarap kiwa em hapoh u pood yong ka chnong.
