Ka seiñ Hynniewtrep Women Welfare & Development Organization (HWW&DO) ha ka 18 tarik uni u bnai hapoh i yahkhmat ka President ka O. Suchiang, ka General Secretary ka M. Bareh, uwa e buit u C. Sungoh deilang wa kiwi ki dkhot da lai yachem ki ya u Deputy Commissioner ka East Jaiñtia Hills District wow pynsñiaw ha oo yei pyrchah yei yoh Environmental Clearance ka Star Cement na ka Ministry of Forest Environment & Climate Change yong ka sorkar India.
Neiliang u DC da pyntip u wa ym ye de wow leh iyi iyi neibhah i por wow pyrchah da kut i wei neiliang yong oo daw phah u ya ini i thoh cha ki bor wa haneiñ. Wei da ong u leh wow pyrchah ya ini emkaam wow lai da kawi won ka luti. Hawa kylli kiyi kitæ ki luti? U DC ym bien u wow khana deiwa ong wa kam ka seiñ toh u thooh yutip hi ko.
Ha i thoh wa da e ka seiñ, da pynsñiaw yei pyrchah wei da beiñ nadooh ya u D C ka East Jaiñtia Hills District uwa toh wow chimkti nyngkong ya ini i kaam, u CEM yong ka JHADC, ki heh yong ka Forest Department, ki heh yong ka Meghalaya State Pollution Control Board, u Forest and Environment Minister wa u Montri Rangbah yong ka jylla wa toh ki wa chna ya ki laad ki luti wow pynyoh Clearance ya ka Star Cement. Deiwa ong leh wa toh ka sorkar wa sooh buit wow thok wow chukor da ki thoh wa thok yow yahbakla yaka sorkar India wow e bor ya ka Star Cement.
Ka seiñ da beiñ ko leh ya ka sorkar MDA wa yakhmat da u Conrad Kongkal Sangma hajrong ini i leh bor deiwa ong leh wa nadooh wa synchaar kani ka sorkar da em chiboon ki kaam kiwa da thmu wow leh thombor wei lehbor kam i ekti ya ka Meghalaya Cherra Cement Limited, i thok yei em i tih mooyong pyrchah ya ka aiñ wei i thmu wow e wai ya ka MeECL.
Kamtæ ka seiñ u yieñ pyrchah bait ko hajrong ini i e Environmental Clearance Certificate ya ka Star Cement wei ym e laad ya kani ka karkhana wow tih ha ya kani ka paar moochuni.
