Ka Dorbar Chnong Pamrapaithlu da pynsñiaw ko yei sñiawngooh wa khroo kamjooh dap ko dei kmen ya ka Seiñ Grassroots Shillong kawa hapoh i yahkhmat u Cheimiki Laloo kam u Team Leader kiwa ha ka 21 tarik uni u bnai da e yarap ki da u khoo wa kiwi kiwi ki marbaam cha ki 22 tylli ki manyung wa dooh ki wym pu em ya ki Card Ration hapoh ka chnong Pamrapaithlu.
Hachwa u saam ya kini ki marbaam da pynman ya i yalang wa tbian wa pynlai da u Waheh Chnong u L.S. Rymbai, hei emlang u Secretary chnong u Solomon Dkhar wa kiwi kiwi kiwa yahkhmat chnong.
Ka Grassroots lyngba u C. Laloo da ong u wa ini i e yarap wa khian man ko i dak wa i nongmumna wow kyrchaan ya ki parabru, khamtam ya kiwa dooh kiwa da chah ktah sakhiat ha kani ka Lockdown ka sorkar wow yakhun pyrchah yei poor smat u khñiang COVID-19. Kamjooh u Laloo da kyntu u leh ya ki paidbah wow bood ryntih ki ya ki aiñ ki kanoon yong ka sorkar wa da hukum lyngba ka Health Department kammon u yada bha ya idæ.
Da yoh leh yei klam na u Solomon Dkhar wa kiwi kiwi de.
