Hadien wa kjut-nood kiwa boon wow pait yei chah ah ki dieñ kam chibynta wow pynheh ya u sarok Shillong-Dawki uwa lai luti na 7th Mile Upper Shillong, heiwa ynnin ka sngi da ah leh ya ki dieñkseh phareng kiwa yieñ ha rood sarok ha ki bynta ka Eastern Air Command iwa man leh i thaw wa miat wa yirngam iwa em chwa wow poi cha ka laad wow lai cha Elephant Falls.
Ha ki Social Media da pynsñiaw ki paidbah nadooh kiwa dang khynroo hadooh kiwa da heh wa katwon kjut-nood u yoo wa kini ki dieñ kiwa da yieñ da boon boon snem kiwa da sah kynmoo ki nadooh dang khian hawa lai luti ki na kani ka thaw- daw wiar noh ki.
Da pynkhuslai ko leh ya kiwa boon neidaw wa i pynheh ya uni u sarok toh cha ka Four Lane, ini da mut wa kini ki dieñ waroh daw chah ah lut ki.
Kamtæ ynne ka sngi neiliang u Montri Rangbah ka jylla u Conrad Sangma da phah u ya ka NHIDCL wow sangeh ya ini chisyndon hadooh wa chem laad kammon wow leh ya ini i kaam.
Uni u sarok toh uwa pynkreh da ka National Highways & Infrastructure Development Corporation (NHIDCL) uwa tip leh kam u NH-40 Shillong-Tamabil uwa sdang nadooh Umshyrpi hadooh Tamabil heiwa katni i kreh wow pynheh ya oo cha u Four Lane da sdang i heiwa da dep leh wow pynman ya ka Public Hearing neibynta ini.
I kreh wow pynheh ya uni u sarok toh iwa da bhah ha ki soo bynta iwa T. 120 klur kawi wei uni u sarok toh uwa jrong 162.661 Km uwa sdang nadooh Jorabat, Assam wei kut u ha Tamabil (Dawki).
Neibynta wow pynheh ya uni u sarok, ka KHADC leh da bait ko wow e yei thaw.
